कुर्ला येथील इलेक्ट्रिक बेस्ट बस अपघातात जवळपास ४८ जण जखमी झाले असून ११ जणांवर खासगी रुग्णालयात उपचार सुरु असल्याची माहिती रुग्णवाहिका चालकाने दिली. इतरांना राजावाडी, केईम, सायन, शताब्दी अशा विविध रुग्णालयांमध्ये दाखल करण्यात आले. यापैकी तिघांचे मृत्यू घटनास्थळीच झाले, तर काही जणांचा उपचारादरम्यान मृत्यू झाला.

जमावाकडून खेचून बस चालकाला मारहाण

दरम्यान, अपघातानंतर घटनास्थळी मोठा जमाव गोळा झाला होता. जमावाने चालकाला बसमधून बाहेर खेचून काढत मारहाण केली. या मारहाणीचा व्हिडिओही सोशल मीडियावर समोर येत आहे. कुर्ल्याहून अंधेरीच्या दिशेने जात असताना गर्दीने खचाखच भरलेल्या बसला हा अपघात झाला.
Kurla BEST Bus Accident : खचाखच भरलेली बस, भरधाव वेग, कुणाला चिरडलं, कुणी थोडक्यात वाचलं, प्रत्यक्षदर्शींनी सांगितलं १ मिनिटात कसा झाला खेळ खल्लास

तांत्रिक बिघाड झाल्याचा दावा तथ्यहीन?

अपघातग्रस्त बसचे ब्रेक फेल झाल्याचा चालकाने केलेला दावा खोटा असल्याचं म्हटलं जात आहे. इलेक्ट्रिक बसमध्ये बिघाड झाल्यास त्या पुढे जात नाहीत, त्यामुळे ब्रेक फेल होऊनही त्या भरधाव वेगात पुढे गेल्याच्या दाव्यात तथ्य नसल्याचे सांगितले जात आहे. तसेच ही बस बेस्टच्या ताफ्यात अवघ्या दोन महिन्यांपूर्वीच दाखल झाल्याने तिच्यात बिघाड होण्याची शक्यताही कमी आहे.
Bus Accident in Kurla : दोन महिन्यापूर्वी बेस्टच्या ताफ्यात, तरी बसचे ब्रेक फेल? पाच बळी घेणाऱ्या कुर्ला अपघातामागे कोण?

चालक मद्यधुंद नाही, परंतु अननुभवी

दुसरीकडे, चालक संजय मोरे मद्यधुंद असल्याची शक्यताही नाकारली जात आहे. पोलिसांनी केलेल्या वैद्यकीय तपासणीत या गोष्टीस दुजोरा मिळाला नाही. तसेच त्याच्या कुटुंबीयांनीही संजय दारुच्या थेंबालाही स्पर्श करत नसल्याचे म्हटले आहे. मात्र त्याला मोठ्या आकाराची बस चालवण्याचा अनुभव नसल्याची माहिती आहे. तो अवघ्या दहा दिवसांपूर्वी कंत्राटी पद्धतीने कामावर रुजू झाला होता. या कारणातून अपघात झाल्याची शक्यता व्यक्त होत आहे.