यावेळी माजी खासदार डॉ. सुजय विखे पाटील, आमदार राम शिंदे, प्रवीण दरेकर, पोपटराव गावडे यांच्यासह भाजपचे नगर व पुणे जिल्ह्यातील प्रमुख पदाधिकारी हजर होते. याबद्दल माध्यमांशी बोलताना फडणवीस म्हणाले, आपल्याला या विवाहाचे निमंत्रण होते, त्यामुळे येथे येऊन वधू-वरांना शुभेच्छा दिल्या आहेत. दोन्ही कुटुंबाला आमच्या शुभेच्छा आहेत.

सुमारे आठ वर्षांपूर्वी १३ जुलै २०१६ रोजी कोपर्डी येथील अल्पवयीन मुलीवर अत्याचार करून तिचा खून करण्यात आला होता. हे घटना त्यावेळी खूप गाजली. राज्यभर वातावरण तापले होते. त्यावेळी फडणवीस मुख्यमंत्री होते. पोलिसांनी आरोपींना अटक केली. २९ नोव्हेंबर २०१७ रोजी आरोपींना सत्र न्यायालयाने फाशीची शिक्षा सुनावली. प्रकरण वरिष्ठ न्यायालयात प्रलंबित आहे. मधल्या काळात यातील प्रमुख आरोपीने तुरुंगातच आत्महत्या केली.

या घटनेतील कुटुंब तेव्हापासून न्यायासाठी पाठपुरावा करीत आहे. या घटनेवरून पुढे मराठा आरक्षणाचे आंदोलन पेटले. यामुळे या लग्नाला उपस्थित राहून फडणवीस यांनी आपण मराठा समाजसोबत असल्याचा संदेश दिल्याचे मानले जात आहे.