केवळ ९२ मते मिळाली

अभिजित बिचुकले पुण्यात बोलत होते. यावेळी त्यांनी ईव्हीएमवर रोष व्यक्त केला. ते म्हणाले, “मला विधानसभा निवडणुकीत २०० मते मिळण्याची अपेक्षा होती. मात्र, बारामती विधानसभा मतदारसंघात केवळ ९२ मते मिळाली. बारामतीतील लोकांनी मला खूप प्रेम दिले. प्रचारादरम्यान शरद पवार आणि अजित पवार यांच्या कार्यकर्त्यांनी गळ्यातील पक्षाचा पंच काढून माझ्यासोबत सेल्फी घेतले. लोक मला ओळखत होते, त्यामुळे मला एवढी कमी मते पडणं शक्यच नाही. त्यामुळे ईव्हीएममध्ये घोळ आहे,” अशी प्रतिक्रिया त्यांनी दिली.
Ajit Pawar : अजित पवार यांची ताकद वाढली पण आव्हान कायम, कौटुंबिक समझोता झाला तरच…

शरद पवारांना पाठिंबा

पुढे बिचुकले म्हणाले, “पंतप्रधान नरेंद्र मोदी यांची एक जुनी क्लिप आहे, ज्यामध्ये ते म्हणाले होते की पुढील निवडणुका बॅलेट पेपरवर घेतल्या जातील. मात्र, तरीही तुम्ही ईव्हीएमवर निवडणूक का घेतली? आज राज्यात अचरजकारक निकाल लागले आहेत. म्हणूनच, मी उघडपणे बोलतो. पंतप्रधान नरेंद्र मोदींनी प्रभू रामचंद्राचा विचार करून सांगावे की ईव्हीएममध्ये घोटाळा आहे की नाही,” असे म्हणत त्यांनी थेट पंतप्रधानांना सवाल केला.

शरद पवार यांचा उल्लेख करताना बिचुकले म्हणाले, “शरद पवार राज्याचे ज्येष्ठ नेते आहेत. त्यांनी अनेक दशकांचे राजकारण पाहिले आहे. त्यामुळे राज्यात त्यांचा एवढा मोठा पराभव होऊ शकत नाही. पवार साहेबांनी ईव्हीएमविरोधात लढा उभारला आहे, आणि त्यासाठी मी त्यांचा पाठीराखा आहे,” असे सांगत त्यांनी ईव्हीएमविरोधी आंदोलनात सहभागी होण्याचा निर्णय घेतला आहे. दरम्यान, राज्यात ईव्हीएमविरोधात महाविकास आघाडीतील नेत्यांनी लढा सुरू केला असून ईव्हीएममधील घोटाळ्यामुळेच महायुतीला हे मिळालं असल्याचं बोललं जात आहे.