द्राक्ष बागायतदारांचे नुकसान
दिंडोरी : तालुक्यातील अनेक ठिकाणी जोरदार पाऊस पडल्यामुळे द्राक्ष बागायतदारांमध्ये चिंतेचे वातावरण निर्माण झाले आहे. तालुक्यातील खेडगाव व पिंपळनारे परिसरात गुरुवारी पहाटे तीन ते साडेतीनदरम्यान प्रचंड पाऊस झाला. फुलोरा व टोपणात आलेल्या द्राक्षांचे मोठ्या प्रमाणात नुकसान झाले आहे. तसेच पुढील दोन ते तीन दिवसांत परत त्याचे फळकुज होऊन मोठे नुकसान होण्याची भीती आहे. द्राक्ष मण्यांना पाणी उतरण्यास सुरुवात झाली असताना तडे जाऊ लागले आहेत. अगदी एक ते दीड महिन्यात पीक हातात येणार आणि अवकाळी पावसाने त्यावर घाला घातला त्यामुळे द्राक्ष उत्पादकांची स्वप्ने धुळीस मिळाली आहेत. त्याचबरोबर मका, सोयाबीनचेही थोड्या प्रमाणात नुकसान झाले आहे.
राज्यातील महायुती सरकारचे नवे शिलेदार! जाणून घ्या मुख्यमंत्र्यांसह दोन्ही उपमुख्यमंत्र्यांचा राजकीय प्रवास
‘पंचनाम्याचे आदेश द्यावे’
देवळा : तालुक्यात गुरुवारी पहाटेच्या सुमारास आलेल्या अवकाळी पाऊस व पडलेल्या दाट धुक्यामुळे तालुक्यात रब्बी हंगामातील कांदा रोप, कांदा पिक, गहू, हरभरा, द्राक्ष आदी पिकांचे मोठ्या प्रमाणात नुकसान झाले. ‘कसमादे’सह जिल्ह्यात बहुतेक शेतकऱ्यांनी पूर्व हंगामी कांदा लागवड सुरू केलेली आहे. त्यामुळे त्यांचेही या पावसाने नुकसान होणार आहे. दरम्यान, गुरुवारी तालुक्यातील वाजगाव, खर्डे, कणकापूर, विठेवाडी झिरे, पिपळ, सावकी, लोहोणेर आदी परिसरात जोरदार पाऊस झाला.
देवेंद्र फडणवीस राज्याचे ३१वे मुख्यमंत्री! ‘या’ दिग्गजांनी सांभाळली महाराष्ट्राची धुरा
त्र्यंबकेश्वरला नभ दाटले
त्र्यंबकेश्वर : बुधवारी रात्री पावसाचा शिडकावा झाला. तर गुरुवारी दिवसभर अवकाशात काळे ढग दाटलेले पाहवयास मिळाले. या खराब हवामानाने द्राक्षबागा, टोमॅटोसह भाजीपालाची पिके अडचणीत आली आहेत. बुरशीजन्य रोगाचा प्रादुर्भाव वाढला आहे.

बागलाणलाही मुसळधार
सटाणा : बागलाण तालुक्यासह सटाणा शहरात गेल्या तीन दिवसांपासून असलेल्या ढगाळ वातारणात गुरुवारी अचानक बदल होऊन सकाळी ७ वाजेच्या सुमारास मुसळधार अवकाळी पावसाने तब्बल एक तास हजेरी लावली. परिणामी, उन्हाळी कांद्याच्या रोपांना व रब्बी पिकांना मोठ्या नुकसानीला सामोरे जावे लागणार आहे. बागलाण तालुक्यात गत तीन दिवसांपासून ढगाळ हवामानाने वातावरणात बदल केलेला होता. दाट धुके व सूर्यदर्शन नसल्याने पिकांच्या वाढीस प्रतिकूल वातावरण होते. या वातावरणाचा सामना करण्यासाठी शेतकरी पिकांवर पवारणी करण्याच्या तयारीत असतानाच गुरुवारी अवकाळीने हजेरी लावल्याने कांदा, कांदे रोप, मका पिकांचे नुकसान झाले आहे.
फडणवीसांचा आमच्या घरी १८ तास मुक्काम, मीठ-भाकर खाल्ली, पिंपरीबुटीतील शेतकऱ्याच्या डोळ्यात आनंदाश्रू
द्राक्ष पिकांना मोठा फटका
निफाड : गुरुवारी पहाटे साडेतीन वाजेच्या सुमारास झालेल्या मुसळधार पावसाने निफाड तालुक्यातील कांदा आणि द्राक्ष पिकांना मोठा फटका बसणार असल्याची शक्यता शेतकऱ्यांनी व्यक्त केली. गुरुवारी पहाटे निफाड, पिंपळगाव, लासलगाव उगाव, ओझर, चांदोरी भागात ३० ते ४० मिनिटे मुसळधार पाऊस झाला. ज्या शेतकऱ्यांचे लाल कांदे काढणीचे काम सुरू होते, त्यांचे नुकसान झाले. तर अर्ली द्राक्ष उत्पादन घेणाऱ्या द्राक्षांचेही नुकसान झाले.