विधानसभा निवडणुकांच्या मतदानाच्या एक दिवस अगोदर भाजप नेते विनोद तावडे यांच्यावर पैसे वाटपाचा आरोप करण्यात आला होता. विरार-नालासोपारामध्ये भाजप आणि बहुजन विकास आघाडी यांच्यात वाद झाला. विरारमधील एका हॉटेलात पैसे वाटप केल्याचा आरोप बहुजन विकास आघाडीच्या हितेंद्र ठाकूर यांच्याकडून करण्यात आला होता. या प्रकरणावरुन राजकीय वातावरण चांगलंच तापलं होतं. तर, काँग्रेसच्या वरिष्ठ नेत्यांसह महाविकास आघाडीच्या नेत्यांनी भाजपवर जोरदार हल्लाबोल केला होता. आता, विनोद तावडे यांनी याप्रकरणी काँग्रेस नेत्यांना नोटीस बजावली आहे. बिनशर्त माफी मागा, नाहीतर १०० कोटींचा दावा ठोकू, असा इशाराच तावडे यांनी विरार प्रकरणावरुन दिला आहे. त्यामध्ये, लोकसभा विरोधीपक्षनेते राहुल गांधी, काँग्रेस अध्यक्ष मल्लिकार्जुन खरगे, आणि काँग्रेस नेत्या सुप्रिया श्रीनेट यांना नोटीस बजावण्यात आली आहे. पुढील २४ तासांत बिनशर्त माफीचा पर्याय विनोद तावडेंकडून देण्यात आला आहे. अन्यथा, १०० कोटींची मानहानीचा दावा ठोकणार असल्याचं तावडे यांनी म्हटलंय.