खासदार वसंत चव्हाण यांच्या निधनाने नांदेडची जागा रिक्त झाली होती. नांदेडमध्ये विधानसभेच्या नऊ जागेसोबतच लोकसभा पोटनिवडणुकीसाठी मतदान घेण्यात आले. काँग्रेसकडून दिवंगत खासदार वसंत चव्हाण यांचे सुपुत्र प्रा. रविंद्र चव्हाण आणि भाजपकडून डॉ. संतुक हंबर्डे हे आमने सामने होते. या दोन्ही उमेदवारांची ही पहिली निवडणूक आहे.

दरम्यान विधानसभेसाठी ६९.४५ टक्के इतके मतदान झाले. तर लोकसभा पोटनिवडणुकीत ६७.४५ टक्के मतदान नोंदवले गेले आहे. दोन्ही निवडणुकीत मतदानाचा टक्का वाढला आहे. एप्रिल महिन्यात देशात झालेल्या सार्वत्रिक लोकसभा निवडणुकीमध्ये नांदेड जिल्ह्यातील सहा विधानसभा मिळून एकूण ११ लाख २८ हजार ५६४ इतके मतदान झाले होते. ही टक्केवारी ६० पूर्णांक ९० टक्के इतकी होती. अल्पसंख्याक समाजाने काँग्रेसला भरघोस मतदान केले. त्यामुळे वसंत चव्हाण यांचा विजय झाला होता. यंदा विधानसभेसोबतच लोकसभा पोटनिवडणूक असल्याने मतदानाची टक्केवारी चांगलीच वाढली आहे. लोकसभा पोटनिवडणुकीसाठी १२ लाख ९४ हजार १५९ इतके मतदान झाले आहे. सार्वत्रिक निवडणुकीपेक्षा १ लाख ६५ हजार ५९५ इतके मतदान अधिक झाले आहे.
Maharashtra Election 2024: निकालाआधी धमाका, सर्वात हॉट मतदारसंघात ठाकरेंचा भाजपला धक्का; महत्त्वाचा नेता शिवबंधनात
लोकसभा क्षेत्रात भोकर, नांदेड उत्तर, नांदेड दक्षिण, नायगाव, देगलूर आणि मुखेड या सहा विधानसभा क्षेत्राचा समावेश होतो. या सहाही मतदार क्षेत्रांत भरघोस मतदान झाले आहे. त्यामुळे वाढलेले मतदान काँग्रेस उमेदवार रविंद्र चव्हाण यांना फायद्याची ठरणार की भाजपचे उमेदवार संतुक हंबर्डे यांच्या पारड्यात पडणार हे पाहणे महत्वाचे असणार आहे.

लोकसभा पोटनिवडणुकीतील मतदारनिहाय आकडेवारी

लोकसभा पोटनिवडणुकीत ६९.४५ टक्के मतदान झाले. सहा मतदार क्षेत्रांत एकूण १२ लाख ९४ हजार १५९ इतक्या मतदारांनी मतदान केले. सर्वाधिक मतदान भोकरमध्ये झालं तर सर्वाधिक कमी मतदान देगलूरमध्ये नोंद करण्यात आले. आकडेवारीनुसार भोकर (२ लाख ३१ हजार ३५६), नांदेड उत्तर (२ लाख १७ हजार ६२२), नांदेड दक्षिण (२ लाख २ हजार ७१७), नायगाव (२ लाख २९ हजार ७५२), मुखेड (२ लाख १५ हजार ४०२), देगलूर (१ लाख १९ हजार ४०९) इतके मतदान झाले आहे.

सहानुभुतीची लाट भाजप मोडीत काढणार ?

दरम्यान नांदेडची पोटनिवडणूक काँग्रेस आणि भाजपासाठी प्रतिष्ठेची बनली आहे. सहानभुतीची लाट मोडून काढण्यासाठी आणि नांदेडची जागा जिंकण्यासाठी पंतप्रधान नरेंद्र मोदी, केंद्रीय मंत्री ज्योतीरादित्य सिंधीया, मुख्यमंत्री एकनाथ शिंदे, उपमुख्यमंत्री देवेंद्र फडणवीस, आंध्रप्रदेशचे उपमुख्यमंत्री पवन कल्याण, पंकजा मुंडे, यांच्यासह दिग्गज नेत्यांच्या सभा घेण्यात आल्या. दुसरीकडे काँग्रेसकडून राहुल गांधी, तेलंगणाचे मुख्यमंत्री रेवंत रेड्डी, नाना पटोले, अमित देशमुख यांच्या सभा पार पडल्या. आतापर्यंतच्या पोटनिवडणुकीत सहानुभुतीची लाट पाहायला मिळाली. हेच चित्र यंदा ही पाहायला मिळणार की भाजप सहानुभूतीची लाट मोडून काढणार? हे मतमोजणीनंतर स्पष्ट होणार आहे.