रायगड, महाड : ‘निष्क्रिये तुझे नाव अनंत गीते’ अशा शब्दात राष्ट्रवादी काँग्रेसचे प्रदेशाध्यक्ष आणि रायगड लोकसभा मतदारसंघाचे उमेदवार खासदार सुनिल तटकरे यांनी महाडमधील महायुतीच्या जाहीर सभेत जोरदार प्रहार केला. बुधवारी श्रीवर्धन विधानसभा मतदारसंघातील रोहा येथे राष्ट्रवादीचा मेळावा पार पडला तर संध्याकाळी महाड विधानसभा मतदारसंघातील लाडवली येथे महायुतीची जाहीर सभा पार पडली त्यावेळी तटकरे बोलत होते.
शरद पवारांनी वसंतदादांच्या पाठीत खंजीर खुपसला असा घणाघाती आरोप अनंत गीते यांनी केला होता. त्याच शरद पवारांचे पाय धरण्याची वेळ तुमच्यावर आली यापेक्षा नैतिक अध:पतन होऊ शकत नाही अशी जोरदार टिकाही सुनिल तटकरे यांनी केली. ज्यांनी ज्यांनी अनंत गीते यांना निवडणूकीत मदत केली त्यांचा विश्वासघात केलात त्यामुळे विश्वास आणि गद्दारीची भाषा तुम्हाला शोभत नाही असा टोलाही सुनिल तटकरे यांनी लगावला.
ही लोकसभेची निवडणूक आहे मात्र बाटली, भूत यावर गीतेंचे रडगाणे सुरू आहे. अहो लोकसभेच्या निवडणूकीत लोकांच्या विकासकामांवर चर्चा केली पाहिजे याकडे लक्ष न देता आमच्यावर टिका केली जात आहे. या अनंत गीते यांनी मतदारसंघात फुटक्या कवडीचे एक काम केलेले दाखवा असे थेट आव्हानच सुनिल तटकरे यांनी दिले. लोकांच्या कामासाठी संधी मिळत असते त्यावेळी आपण त्या संधीचे सोने करायचे असते. भरतशेठ आपण पोलादपूर पितळवाडीमध्ये माझ्या प्रचाराची सुरुवात केलात तो क्षण मी आयुष्यात कधी विसरणार नाही असेही सुनिल तटकरे म्हणाले.
भरतशेठ तुम्ही स्वतः च्या कर्तुत्वावर पुढे आला आहात. विधानसभेवर लाखोंच्या फरकाने निवडून याल यात शंका नाही असे सांगतानाच केंद्रसरकारने व राज्यसरकारने अनेक योजना आणल्या आहेत. त्या योजनांची अंमलबजावणी केली जात आहे. अदितीताई तटकरे महिलांच्या योजना योग्य पद्धतीने राबवत आहेत. रायगड येथे शिवसृष्टी उभी करायची आहे. यासाठी भारत सरकारच्या माध्यमातून जे जे सहकार्य लागेल ते करण्याचे आश्वासन सुनिल तटकरे यांनी दिले.
या निवडणुकीत आता घड्याळ या चिन्हासमोरील बटण दाबून आपल्याला मतदान करायचे आहे आणि पुढील विधानसभा निवडणुकीत धनुष्यबाणावर बटण दाबून भरतशेठ गोगावले यांना मोठ्या फरकाने विजयी करायचे आहे असे आवाहनही सुनिल तटकरे यांनी केले. मी सभ्यता बाळगतो याचा अर्थ मी कमकुवत आहे असे कुणी समजू नये. चुकीचे बोलून बोट दाखवण्याचा प्रयत्न झाला तर ते खपवून घेतले जाणार नाही असा थेट इशाराही सुनिल तटकरे यांनी टिकाकारांना दिला.
जिथे पवार दिसेल तिथेच मतदान करा, सगळं फिट्टमफाट होईल; बारामतीत अजितदादा सुस्साट!
महायुतीचा उमेदवार म्हणून मला १८ व्या लोकसभेत निवडून द्या पुढील पाच वर्षे तुमची सेवा करण्याची संधी सोडणार नाही असा शब्द सुनिल तटकरे यांनी यावेळी बोलताना दिला. आता अनंत गीतेंना बाटलीतही भरायचे आणि टकमक टोकावरून ढकलूनही द्यायचे;आमदार भरतशेठ गोगावलेंचा थेट हल्लाबोल त्यांनी केला.
स्वतःचे पैसे खर्च करून आणि मातोश्रीवरून आलेले पैसे खर्च करून गीतेंना निवडून आणले. निवडून आल्यानंतर एकदाही या माणसाने आभार मानण्यासाठी कॉल केला नाही इतका वाईट माणूस आहे. त्यामुळे आता अनंत गीतेंना बाटलीतही भरायचे आहे आणि टकमक टोकावरून ढकलून द्यायचे आहे. यापुढे कधी या मतदारसंघात उभे राहण्याचे धाडस करणार नाही असा थेट इशाराही भरतशेठ गोगावले यांनी दिला.वेळ पडल्यास आपण देशाची राज्यघटनाच बदलू… जानकरांच्या वक्तव्यावर आंबेडकरी संघटनांकडून निषेध
सहा वेळा खासदार आणि दोन वेळा मंत्री राहूनही अनंत गीते यांनी कधी मतदारसंघात विकासकामे केली नाहीत किंवा सुशोभीकरणाची ऐतिहासिक कामे केली नाहीत असा थेट हल्लाबोल भरतशेठ गोगावले यांनी केला. झाडाच्या सावलीखाली बसतो त्या झाडाला आणि जो मतदान करतो त्या मतदाराला कधी विसरायचे नसते असा सल्लाही भरतशेठ गोगावले यांनी दिला. रायगडच्या पुण्य आणि पावन भूमीतून सुनिल तटकरे यांना प्रचंड मताधिक्याने निवडून द्यायचे आहे असे आवाहनही भरतशेठ गोगावले यांनी केले.
कितीही खर्च आला तरी आम्ही रायगडच्या पायथ्याशी भव्य शिवसृष्टी उभारणार हे आमचे स्वप्न आहे असा शब्द आमदार भरतशेठ गोगावले यांनी यावेळी दिला. महाड विधानसभा मतदारसंघातील लाडवली येथे आज महायुतीची जाहीर सभा पार पडली. या जाहीर सभेत उपस्थित नेत्यांनी एल्गार पुकारला असून सर्वाधिक मताधिक्य देण्याचा निर्धार यावेळी करण्यात आला.
महायुतीच्या या जाहीर सभेला शिवसेना मुख्य प्रतोद आमदार भरतशेठ गोगावले, युवा नेते विकास गोगावले, जिल्हाप्रमुख प्रमोद घोसाळकर, संपर्कप्रमुख बंधू तरडे, भाजप शहर सरचिटणीस महेश शिंदे, राष्ट्रवादी काँग्रेसचे नेते सुभाष निकम, राष्ट्रवादी तालुकाध्यक्ष निलेश महाडिक आदींसह पक्षाचे पदाधिकारी व कार्यकर्ते मोठया संख्येने उपस्थित होते.