म. टा. प्रतिनिधी, ठाणे : कासारवडवली उड्डाणपुलाच्या कामामुळे अरुंद झालेल्या घोडबंदर रोड मार्गिकेवर अतिअवजड वाहनांना प्रवेशबंदी करण्यात आली आहे. या वाहनांची वाहतूक येत्या सहा महिन्यांसाठी पर्यायी मार्गाने वळवण्यात आली आहे. ठाणे वाहतूक शाखेने याबाबत अधिसूचना जारी केली असून, या बदलांमुळे घोडबंदर रोडवरील कोंडी काही प्रमाणात कमी होण्याची शक्यता आहे.उरणच्या जेएनपीटी बंदर, भिवंडी, नाशिक येथून अतिअवजड मालवाहू वाहने घोडबंदरमार्गे मुंबई-अहमदाबाद महामार्गावरून गुजरातच्या दिशेने वाहतूक करतात. घोडबंदर रोडच्या दोन्ही बाजूला नव्याने गृहसंकुले उभी राहिल्याने खासगी वाहने आणि सार्वजनिक परिवहन सेवेच्या बसची वर्दळ मोठ्या प्रमाणात येथून होते. तसेच या मार्गावर ‘वडाळा-घाटकोपर-कासारवडवली’ या मेट्रो चार प्रकल्पाचे काम प्रगतिपथावर आहे. मेट्रोच्या कामादरम्यान गर्डर लॉन्चिंग केले जातात. या कामासाठी वाहतुकीत बदल करावे लागतात. तसेच मेट्रोच्या बॅरिकेड्समुळे अनेक ठिकाणी मार्गिका अरुंद झाल्याने वाहनचालकांना कोंडीचा सामना करावा लागतो. या परिस्थितीत ही कोंडी फोडण्यासाठी ‘एमएमआरडीए’ने कासारवडवली चौकात उड्डाणपूल उभारण्याचे काम हाती घेतले आहे. त्यामुळे याठिकाणी मुख्य रस्त्यावर १२ फूट रुंद असलेली एक मार्गिका सध्या वाहतुकीसाठी उपलब्ध आहे. त्यामुळे या रस्त्यावर अतिअवजड वाहने अडकून खोळंबा होऊ नये, यासाठी सहा महिन्यांसाठी वाहतूक बदल लागू केल्याची माहिती ठाणे वाहतूक शाखेचे पोलिस उपायुक्त डॉ. विनयकुमार राठोड यांनी दिली.
मनसे कार्यकर्त्यांत संभ्रम, पक्षाकडून अधिकृत भूमिका जाहीर नाही; प्रचाराबाबतही गोंधळ

यांना ‘नो एन्ट्री’

रेल्वेच्या बोगी, पवनचक्क्यांचे पाते, महाकाय यंत्रसामग्री, प्रचंड बॉयलर घेऊन जाणारी ओडिसी वाहने अर्थात मालवाहू अतिअवजड वाहनांना घोडबंदर रोडवर सहा महिने प्रवेश बंदी केली आहे. त्यामुळे येत्या पावसाळ्यात या मार्गावर अशा वाहनांमुळे संथ गतीने होणाऱ्या वाहतुकीला ब्रेक लागणार आहे.

या मार्गाने वाहतूक

मुंबई, ठाणे येथून घोडबंदरच्या दिशेने वाहतूक करणाऱ्या अवजड वाहनांना कापूरबावडी व वाय जंक्शन पुलावर प्रवेशबंदी असेल. ही वाहने कापूरबावडी वाहतूक शाखेजवळून उजवीकडे वळण घेऊन खारेगाव टोलनाका, मानकोलीमार्गे वाहतूक करतील. किंवा खारेगाव टोलनाका, मानकोली, कशेळी येथून वाहतूक करतील.

– मुंब्रा बायपास, कळवा येथून खारेगाव टोलनाकामार्गे घोडबंदरच्या दिशेने वाहतूक करणाऱ्या वाहनांना खारेगाव टोलनाका येथे प्रवेशबंदी आहे. ही वाहने गॅमनमार्गे खारेगाव खाडी पुलाखालून खारेगाव टोलनाका, मानकोली, अंजुरफाटामार्गे इच्छितस्थळी जातील.

– नाशिक येथून घोडबंदरच्या दिशेने वाहतूक करणाऱ्या अतिअवजड वाहनांना मानकोली नाका येथे प्रवेशबंदी असेल. येथील वाहने मानकोली पुलाखालून अंजुरफाटामार्गे पुढे जातील.