म. टा. प्रतिनिधी, नाशिक : कंपन्यांकडे असलेली विमानांची कमतरता, राजकारण्यांकडून सुरू असलेली विमानांची पळवापळवी व नाशिकच्या राजकीय नेत्यांचे दिल्लीत पडू न शकणारे वजन आदी कारणांमुळे नाशिकच्या विमानसेवेला सातत्याने ग्रहण लागत आहे. गेल्या सात वर्षांत सहा कंपन्यांची सेवा बंद पडली असून, त्यामुळे प्रवाशांची फरपट होत आहे.
गेल्या १५ मार्चपासून ओझर विमानतळावरून ‘इंडिगो’ची विमानसेवा सुरू असून, या सेवेत बऱ्यापैकी सातत्य राहिल्याने नाशिककरांकडून समाधान व्यक्त होत होते. नाशिकहून आठवड्याचे सातही दिवस अहमदाबाद (दोन फ्लाइट्स), नागपूर, इंदूर, गोवा व हैदराबाद या शहरांसाठी विमानसेवा सुरू होती. मात्र, आता त्यात कपात करण्यात आली असून, अहमदाबादची एक फ्लाइट रद्द करण्यात आली आहे. उरलेली एक फ्लाइटही आठवड्याचे सहा दिवस उड्डाण घेणार असून, ती दर बुधवारी उपलब्ध राहणार नाही. तर इंदूरचे विमान केवळ मंगळवार, गुरुवार व शनिवार या दिवशीच उपलब्ध राहील. या कपातीमुळे उद्योग व पर्यटन क्षेत्रातून तीव्र नाराजी व्यक्त होत आहे. यासंदर्भात ‘इंडिगो’कडे विचारणा केली असता, त्यांच्याकडून या कपातीमागील नेमके कारण सांगण्यात आले नाही. काहींकडून अपुऱ्या प्रवासीसंख्येचे कारण पुढे केले जात असले, तरी त्यात तथ्य नाही. कारण गेले वर्षभर नाशिक विमानतळावरील सर्व विमानांना ८५ टक्क्यांपर्यंत बुकिंग झाल्याची आकडेवारी आहे. सरकार दरबारी वजन असलेले अन्य शहरांतील राजकीय नेते नाशिकची सेवा आपल्या शहराकडे वळवत असल्याचे बोलले जात आहे. त्याला मात्र अभ्यासकांकडून दुजोरा दिला जात आहे.
दरम्यान, सात वर्षांत बंद पडलेल्या विमानसेवांमागे राजकीय इच्छाशक्तीच्या अभावासह बंद झालेली उडान योजना व कंपन्यांची बिघडलेली आर्थिक स्थिती हीदेखील कारणे आहेत.
नाशिकमधून बंद पडलेल्या विमानसेवा
एअर डेक्कन मुंबई २०१७
जेट एअरवेज दिल्ली २०१८
एअर अलायन्स हैदराबाद, अहमदाबाद, पुणे, बेळगाव २०१९
ट्रू जेट अहमदाबाद २०२०
स्टार एअर बेळगाव २०२०
स्पाइसजेट दिल्ली, बेंगळुरू, हैदराबाद २०२३
गेल्या वर्षी सव्वादोन लाख प्रवासी
विमानसेवेत कपात करण्यामागे अपुऱ्या प्रवासीसंख्येचे कारण सांगून दिशाभूल केली जाते. जानेवारी ते डिसेंबर २०२३ या वर्षभराच्या कालावधीत नाशिक विमानळावरून सव्वादोन लाख जणांनी प्रवास केला. जानेवारी (१३,६२६), फेब्रुवारी (१२,२७३), मार्च (१४,०२४), एप्रिल (१५,३११), मे (१४,२१८), जुलै (२०,२१२), ऑगस्ट (२०,०८३), सप्टेंबर (१९,७९९), ऑक्टोबर (२०,९०४), नोव्हेंबर (२०,३७५), डिसेंबर (२४,२९३) अशी प्रवाशांची आकडेवारी असून, सर्व फ्लाइट्स ८५ टक्क्यांपर्यंत फुल्ल होत्या. इंदूरच्या विमानसेवेत कपात करण्यात आली असली, तर काल (दि. ३१) ७८ आसनी इंदूर विमानात ७२ प्रवासी होते.
शिर्डीचा ओघ पुन्हा नाशिककडे?
नाशिकला विमानतळ असूनही शिर्डीच्या विमानतळाला चाल देण्यात आली. मात्र, तेथील टर्मिनलचे काम अद्याप बाकी आहे. दोन महिन्यांत हे काम सुरू होणार असून, सुमारे वर्षभर शिर्डी विमानतळ बंद ठेवले जाण्याची शक्यता आहे. त्या काळात विमानांचा ओघ पुन्हा नाशिककडे वळू शकतो, असा तज्ज्ञांचा अंदाज आहे.
देशातील विमानतळांची संख्या ७४ वरून १४९ वर गेल्याने छोट्या शहरांत विमानसेवेची मागणी वाढली आहे, तर कंपन्यांकडे विमानांचा तुटवडा आहे. त्यामुळे नव्या ठिकाणी सेवा सुरू करताना जुन्या ठिकाणच्या सेवेत कपात करावी लागते. त्यामुळे नाशिकला अधिकाधिक कंपन्यांची सेवा सुरू होणे गरजेचे आहे. तरच स्पर्धा व पर्याय वाढतील. दिल्लीतील राजकीय वजन हा खूप महत्त्वाचा विषय असून, त्यावर बरेच काही अवलंबून असते.- धैर्यशील वंडेकर, हवाई वाहतूकतज्ज्ञ