धाराशिव : परभणीची जागा महायुतीतील भागीदार राष्ट्रीय समाज पक्षाला दिल्यानंतर अजित पवार यांच्या राष्ट्रवादी काँग्रेस पक्षाला उस्मानाबाद म्हणजेच धाराशिव लोकसभेची जागा शिवसेना-भाजपकडून मिळण्याची शक्यता आहे. भाजप आमदाराच्या पत्नीला राष्ट्रवादीच्या ‘घड्याळ’ चिन्हावरुन मैदानात उतरवलं जाण्याची चिन्हं आहेत.
धाराशिव मतदारसंघातून उमेदवार म्हणून राष्ट्रवादीचे विधानपरिषद आमदार विक्रम काळे यांच्या नावाची चर्चा सुरु आहे. त्यातच तुळजापूरचे भाजप आमदार राणा जगजितसिंह पाटील यांच्या पत्नी अर्चना पाटील या मतदारसंघातून निवडणूक लढवणार असल्याचे समोर आले आहे.
कोण आहेत अर्चना पाटील?
अर्चना पाटील यापूर्वी उस्मानाबाद जिल्हा परिषदेच्या उपसभापती होत्या, मात्र सध्या त्या कोणतेही पद सांभाळत नाहीत. लोकसभेच्या माध्यमातून त्या पुन्हा निवडणुकीच्या आखाड्यात परतण्याची शक्यता वर्तवली जात आहे.
राणा जगजितसिंह यांनी २०१९ ची लोकसभा निवडणूक राष्ट्रवादीच्या तिकीटावर लढवली होती. शिवसेनेच्या (आता ठाकरे गट) ओमराजे निंबाळकर यांच्या विरोधात राणा मैदानात उतरले होते. मात्र त्यांना पराभवाचा सामना करावा लागला होता.
राष्ट्रवादीतून भाजपात
२०१९ च्या विधानसभा निवडणुकांपूर्वी त्यांनी अमित शाहांच्या उपस्थितीत भाजपमध्ये प्रवेश केला होता. त्यानंतर ते तुळजापूर विधानसभा मतदारसंघातून निवडणूक लढवनू विजयी झाले. याआधी 2004 ते 2008 आणि 2008 ते 2014 या काळात दोन वेळा महाराष्ट्र विधान परिषदेचे सदस्य राहिले आहेत.
उद्धव ठाकरे यांच्या नेतृत्वातील शिवसेनेने ओमराजे निंबाळकर यांना पुन्हा तिकीट दिले आहे. आता राणांची पत्नी त्याच मतदारसंघातून ओमराजेंविरोधातच मैदानात उतरली, तर पतीच्या पराभवाचा वचपा काढण्याची संधी त्यांना असेल.
येऊदे कितीबी… पवारांचा कॉलर उडवतानाचा व्हिडिओ, सुप्रिया सुळेंच्या WhatsApp स्टेटसची चर्चा
राणा जगजितसिंह आणि निंबाळकर यांच्यात कौटुंबिक वैर आहे, निंबाळकरांच्या वडिलांचा राणा जगजितसिंह यांच्या वडिलांनी खून केल्याचा आरोप आहे.
धाराशिवमधील वादावर मुंबईत पत्रकारांशी बोलताना नुकतेच उपमुख्यमंत्री देवेंद्र फडणवीस म्हणाले होते की, “आम्ही त्यांना आपापसात चर्चा करुन अंतिम नाव कळवण्यास सांगितले आहे.”
Read Latest Maharashtra News Updates And Marathi News
मराठवाड्यात राष्ट्रवादीला अद्याप एकही जागा नाही
मराठवाड्यातील लोकसभेच्या आठ जागांपैकी भाजपने बीड, जालना, लातूर आणि नांदेड या चार जागांवर आपले उमेदवार जाहीर केले आहेत, तर शिवसेनेने हिंगोलीसाठी उमेदवार निश्चित केला आहे. परभणीची जागा रासपसाठी सोडण्यात आली असून, अध्यक्ष महादेव जानकर निवडणूक लढवत आहेत.