म. टा. खास प्रतिनिधी, मुंबई : मुलुंड पश्चिमेकडील एका व्यावसायिक इमारतीच्या सहाव्या मजल्यावर मंगळवारी सकाळी साडेनऊ वाजता आग लागली. या आगीने रौद्ररूप धारण केल्याने आगीवर नियंत्रण मिळवण्यात अग्निशमन दलाला चार तास लागले. मात्र, इमारतीतून जवळपास ५० जणांची सुटका करण्यात अग्निशमन दलाला यश आले.मुलुंड पश्चिमेला एलबीएस मार्गावर सहा मजली व्यावसायिक इमारत आहे. या इमारतीच्या सहाव्या मजल्यावर एक हजार चौरस फूट जागेत खासगी कार्यालय आहे. सकाळी साडेनऊच्या सुमारास या कार्यालयात दाखल झालेल्या कर्मचाऱ्याने एसी सुरू करताच त्यातून धूर येण्यास सुरुवात झाली. थोड्या वेळात धुराचे प्रमाण वाढत जाऊन अचानक आग लागली आणि हा एसी त्याच कार्यालयात खाली पडला. पेटलेल्या एसीमुळे कार्यालयातील लाकडी फर्निचरने पेट घेतला. उपस्थित कर्मचाऱ्याने अग्निशमन यंत्रणेचा वापर करून आग विझवण्याचा प्रयत्न केला, मात्र ही यंत्रणाच सुरू होत नव्हती.
नाशिकच्या रिंगणात महंतांचा मेळा, सिद्धेश्वरानंद सरस्वती महाराजांची लोकसभा निवडणुकीत उडी
तोवर ही आग वाढतच गेली आणि इमारतीतील तळमजल्यापर्यंत प्रचंड धूर पसरला. त्यामुळे एकच पळापळ सुरू झाली. या घटनेची माहिती मिळताच चार फायर इंजिन, वॉटर टँकरसह दाखल झालेल्या अग्निशमन दलाच्या जवानांनी आगीवर नियंत्रण मिळवण्याचे प्रयत्न सुरू केले. मोठ्या प्रमाणात पसरलेल्या धुरामुळे इमारतीत अडकलेल्यांना बाहेर पडण्यासाठी मार्गही सापडत नव्हते. त्यातच सहाव्या मजल्यावरील आगही वाढतच होती. आग विझवण्याचे प्रयत्न सुरू असतानाच अग्निशमन दलाने इमारतीत अडकलेल्या कर्मचाऱ्यांची सुटका करण्यासाठी इमारतीत प्रवेश केला.

सहाव्या मजल्यावर सात ते आठ जण धुरामुळे बसूनच राहिले होते. त्यांना त्वरीत बाहेर काढण्यात आले. तर, इमारतीच्या अन्य मजल्यांवर अडकलेल्या कर्मचाऱ्यांनाही हळूहळू इमारतीबाहेर पडण्यासाठी मार्ग दाखवण्यात आल्याचे अग्निशमन दलाकडून सांगण्यात आले. जवळपास ५० जणांना इमारतीतून सुखरूपपणे बाहेर काढण्यात अग्निशमन दलाला यश मिळाले. आगीवर नियंत्रण मिळवण्यासाठी दुपारचा दीड वाजला. आगीत कार्यालयीन कागदपत्रे, लाकडी फर्निचर, इलेक्ट्रिक वायर खाक झाल्या. या घटनेत कोणतीही जीवितहानी झाली नाही. इमारतीचे काम सुरू असल्याने इमारतीतील काही अग्निशमन यंत्रणा बंदच असल्याचेही अग्निशमन दलाच्या निदर्शनास आले.