नागपूर : विदर्भातील पहिल्या टप्प्यातील पाच लोकसभा मतदारसंघातील लढती अखेर ठरल्या आहेत. उमेदवारी अर्ज भरण्यासाठी तांत्रिकदृष्ट्या अवघे दोन दिवस उरले असताना भाजप आणि काँग्रेसने रविवारी तीन जागांवरील उमेदवार जाहीर केले. तर, रामटेकमधील महानाट्याने ‘चर्चे’तील वळण घेतले.
उमरेडचे काँग्रेसचे आमदार राजू पारवे यांनी होळीच्या पर्वावर आमदारकीचा राजीनामा देत शिवसेनेत प्रवेश घेतला. या घडामोडीने विद्यमान खासदार कृपाल तुमाने यांचा पत्ता साफ झाल्याचे मानले जात आहे. तसेच भाजप इच्छुकांचे मनसुबेही उधळले गेले आहेत. पारवे यांच्या उमेदवारीची घोषणा मात्र पक्षप्रवेशाच्या दिवशी झाली नाही.
चंद्रपूर लोकसभा मतदारसंघात काँग्रेसने आमदार प्रतिभा धानोरकर यांना उमेदवारी दिली. प्रलंबित तिढा सोडवला. येथे आता भाजपचे सुधीर मुनगंटीवार विरुद्ध धानोरकर असा सामना रंगणार आहे. भाजपने भंडारा-गोंदियातून सुनील मेंढे आणि गडचिरोलीतून अशोक नेते यांना पुन्हा संधी दिली. नेते सलग तिसऱ्यांदा रिंगणात आहेत. काँग्रेसने या जागांवरून अनुक्रमे डॉ. प्रशांत पडोळे आणि डॉ. नामदेव किरसान यांना उमेदवारी दिली आहे. नागपुरातून केंद्रीय मंत्री नितीन गडकरी विरुद्ध काँग्रेसचे आमदार आणि शहराध्यक्ष विकास ठाकरे अशी लढत आहे.
४० वर्ष निष्ठावंत, सत्तरी आली, नाराजीचा काँग्रेसला काय फरक पडतो? पुण्यात माजी उपमहापौर चिडले
चंद्रपूर मतदारसंघातून काँग्रेसकडून विजय वडेट्टीवार की त्यांची मुलगी शिवानी वडेट्टीवार यांना उमेदवारी मिळणार की पक्ष धानोरकर यांच्या कलाने घेणार याबाबत उत्सुकता होती. गेल्या तीन दिवसांपासून मतदारसंघात कार्यकर्त्यांमध्ये संभ्रम होता. अखेरीस तो दूर झाला. २०१९ च्या निवडणुकीत बाळू धानोरकर यांच्या रूपाने चंद्रपूर लोकसभा मतदारसंघात विजय मिळविला होता. महाराष्ट्रात केवळ एकमेव चंद्रपूरची जागा निवडून आली होती. त्यांच्या निधनानंतर आमदार प्रतिभा धानोरकर यांनी या मतदारसंघावर दावेदारी केली होती.
Read Latest Maharashtra News Updates And Marathi News
रामटेकसह नागपूर, भंडारा-गोंदिया, गडचिरोली-चिमूर, चंद्रपूर याच पाच मतदारसंघात येत्या १९ एप्रिल रोजी निवडणूक आहे. उमेदवारी अर्ज भरण्याची २७ मार्च ही शेवटची तारीख आहे. त्यातच आज, सोमवारी धुळवडीची सुट्टी आल्याने मंगळवार आणि बुधवार असे दोनच दिवस आहेत. या स्थितीत आज पारवे यांच्या नावाची घोषणा होण्याची दाट शक्यता आहे.