जितेंद्र खापरे, नागपूर : उमरेड विधानसभा मतदारसंघातील काँग्रेसचे आमदार राजू पारवे यांनी मुख्यमंत्री एकनाथ शिंदे यांच्या शिवसेनेत अधिकृतपणे प्रवेश केला आहे. शिवसेना त्यांना रामटेक लोकसभा मतदारसंघातून उमेदवारी देण्याची शक्यता आहे. मात्र महायुतीने अद्याप अधिकृत घोषणा केलेली नाही. राजू पारवे हे दीर्घकाळापासून लोकसभा निवडणूक लढविण्यास इच्छुक आहेत. ते भाजपमध्ये प्रवेश करतील, अशी चर्चा सुरू होती. नुकतीच त्यांनी उपमुख्यमंत्री देवेंद्र फडणवीस यांची त्यांच्या ‘देवगिरी’ बंगल्यावर भेट घेतली होती. यावेळी त्यांच्यासोबत भाजपचे प्रदेशाध्यक्ष चंद्रशेखर बावनकुळेही होते.
नागपूरसह विदर्भात वेगाने राजकीय घडामोडी घडत असून निवडणुकीचा ज्वर वाढू लागला आहे. रविवार हा राजकीय घडामोडींसाठी खऱ्या अर्थाने होळीचा म्हणजेच शिमग्याचा दिवस ठरला. उमरेडचे काँग्रेस आमदार राजू पारवे यांनी काँग्रेसला रामराम ठोकत शिवसेनेत प्रवेश केला. मुंबईत हा पक्षप्रवेश पार पडला. यावेळी मुख्यमंत्री एकनाथ शिंदे, उपमुख्यमंत्री अजित पवार, उपमुख्यमंत्री देवेंद्र फडणवीस प्रामुख्याने उपस्थित होते. पारवे यांनी त्यांच्या आमदारकीचा राजीनामा दिला आहे. विशेष म्हणजे पक्षप्रवेश झाल्याबरोबरच राजू पारवे यांना रामटेक लोकसभा मतदारसंघाची उमेदवारी देण्याबाबतचे संकेत देण्यात आले आहेत.
उमरेडचे काँग्रेस आमदार राजू पारवे यांनी काही दिवसांपूर्वी उपमुख्यमंत्री देवेंद्र फडणवीस यांची भेट घेतली होती. यावरून ते काँग्रेस सोडणार असे भाकीत राजकीय तज्ज्ञांनी व्यक्त केले होते. मात्र ते शिवसेनेत प्रवेश करून तत्काळ त्यांना लोकसभा उमेदवारी मिळेल वा तसा शब्द पक्षश्रेष्ठींकडून देण्यात येईल, असा अंदाज कुणालाही आला नाही. पारवे यांच्या शिवसेना प्रवेशाने कृपाल तुमाने यांचा राजकीय गेम झाल्याची चर्चा आहे. पुढच्या दोन दिवसांत पारवे यांना अधिकृतपणे लोकसभा उमेदवारी देण्यात येईल, असे सूत्रांनी सांगितले.