म. टा. प्रतिनिधी, पुणे: प्रवाशांच्या सुविधेसाठी पुणे रेल्वेकडून मेट्रो स्टेशन परिसरात तिकीट व्हेंडिंग मशिन बसविण्यात आली आहेत. त्यामुळे आता प्रवाशांना मेट्रोतून उतरल्यावर रेल्वे पादचारी पुलावर जाण्याआधीच तिकीट काढता येणार आहे. ‘महामेट्रो’ला रेल्वे स्टेशन परिसरात तिकीट व्हेंडिंग मशिन बसविण्यासाठी कधी मुहूर्त मिळणार, असा प्रश्न प्रवासी विचारत आहेत.वनाझ ते रामवाडी मेट्रो मार्गावर पुणे रेल्वे स्थानकानजीक मेट्रो स्टेशन आहे. तेथून प्रवाशांना थेट पुणे रेल्वे स्टेशनावर प्रवेश मिळतो. त्यामुळे रेल्वेने प्रवास करणाऱ्यांना मेट्रोतून उतरल्यावर पादचारी पुलावरून थेट प्लॅटफॉर्मवर जाता येते. मात्र, मेट्रोचे बरेच प्रवासी पुणे रेल्वे स्टेशनातील पादचारी पूल वापरून समोरच्या बाजूला जातात. पुणे रेल्वे स्टेशन येथून जाताना रेल्वेचे तिकीट अथवा प्लॅटफॉर्म तिकीट असणे आवश्यक असते. मात्र, प्रवासी रेल्वेचे तिकीट न घेताच पादचारी पुलाचा वापर करतात. त्यामुळे रेल्वेचे तिकीट तपासणी अधिकारी प्रवाशांवर कारवाई करतात. त्यावर ‘मेट्रोचे तिकीट असेल तरी प्रवाशांना रेल्वेच्या पादचारी पुलावरून जाऊ द्या,’ अशी मागणी महामेट्रोकडून रेल्वेकडे करण्यात आली होती. त्यानुसार, रेल्वे प्रशासनाने मेट्रोतून उतरल्यावर रेल्वे पादचारी पुलाचा वापर करून दुसऱ्या बाजूला जाणाऱ्या प्रवाशांना फ्लॅटफॉर्म तिकीट काढता यावे, यासाठी मेट्रो स्टेशन परिसरात तिकीट व्हेंडिंग मशिन बसविले आहे. त्यामुळे प्रवाशांना फ्लॅटफॉर्म आणि अन्य तिकीट मेट्रो स्टेशन परिसरात काढता येणार आहे.

‘क्यूआर कोड’ची प्रतीक्षाच

रेल्वेने मेट्रो स्टेशन परिसरात तिकीट व्हेंडिंग मशिन बसवले आहे. मेट्रो प्रशासनाने रेल्वे स्टेशनच्या परिसरात दोन ते तीन ठिकाणी तिकीट व्हेंडिंग मशिन बसविण्यासाठी रेल्वेकडे परवानगी मागितली आहे. रेल्वे स्टेशन येथे प्रवाशांना तिकीट काढण्यासाठी ‘क्यूआर कोड’ लावले जाणार होते. मात्र, अद्याप मेट्रोला ते लावण्यासाठी मुहूर्त मिळालेला नाही.