म. टा. प्रतिनिधी, हडपसर : गेल्या काही वर्षांपासून बंद असलेल्या पोल्ट्रीची भिंत अंगावर पडून दोन अल्पवयीन शाळकरी मुलांचा जागीच मृत्यू झाला. ही घटना लोणी काळभोर हद्दीतील पांडवदंड परिसरात गुरुवारी दुपारी एक वाजण्याच्या सुमारास घडली.
दुर्मीळ आजाराने ग्रस्त, हाताच्या विच्छेदनाचा सल्ला, मुंबईच्या डॉक्टरांकडून ३ आठवड्यांच्या बाळाला जीवनदान
यश मयूर काळभोर (वय १४, रा. पांडवदंड रोड, कदमवाकवस्ती) आणि प्रथमेश संदीप बोरुडे (वय १५, सध्या रा. कदमवाकवस्ती, मूळ रा. श्रीरामपूर, नगर) अशी मृत्यू झालेल्या दोन अल्पवयीन शाळकरी मुलांची नावे आहेत. दरम्यान, भिंत पडत असल्याचे वेळीच लक्षात आल्याने भिंतीजवळ उभे असलेले यशचे वडील मयूर काळभोर आणि त्यांचा मित्र संदीप बोरुडे हे दोघे जण बाजूला झाल्याने त्यांचे प्राण वाचले.लोणी काळभोर पोलिसांनी दिलेल्या माहितीनुसार, मयूर काळभोर यांची लोणी काळभोर हद्दीत पांडवदंड परिसरात जुनी पोल्ट्री होती. ही पोल्ट्री स्वच्छ करण्याचे काम मागील दोन दिवसांपासून सुरू होते. गुरुवारी मयूर काळभोर व त्यांचा मुलगा यश आणि मित्र संदीप बोरुडे व त्यांचा मुलगा प्रथमेश हे टिकावाच्या मदतीने भिंत पाडत होते. दरम्यान, दुपारी एक वाजण्याच्या सुमारास अचानक भिंत कोसळल्याने या भिंतीच्या बाजूला उभे असलेले यश व प्रथमेश भिंतीखाली गाडले गेले. नागरिकांनी तत्काळ भिंत हटविण्याचे काम सुरू केले आणि दोन्ही मुलांना बाहेर काढून लोणी काळभोर येथील खासगी रुग्णालयात दाखल केले. मात्र, उपचारापूर्वीच दोघांचा मृत्यू झाल्याचे डॉक्टरांनी सांगितले. यश काळभोर हा इयत्ता आठवीच्या वर्गात शिकत होता, तर त्याचा मित्र प्रथमेश बोरुडे हा नववीच्या वर्गात शिकत होता.

फोटो – यश काळभोर आणि प्रथमेश बोरुडे