सोलापूर : सोलापूर लोकसभा मतदारसंघातून काँग्रेसतर्फे आमदार प्रणिती शिंदे यांचं नाव जवळपास निश्चित मानलं जात आहे. तर भाजप विद्यमान खासदार जय सिद्धेश्वर स्वामी यांचा पत्ता कापण्याची चिन्हं आहेत. भाजपचा उमेदवार अद्याप ठरलेला नाही. परंतु दलित इंडियन चेंबर ऑफ कॉमर्स इंडस्ट्रीज (डिक्की) प्रमुख पद्मश्री सन्मानित मिलिंद कांबळे यांना भाजपकडून तिकीट मिळण्याची शक्यता वर्तवली जात आहे.
उपमुख्यमंत्री देवेंद्र फडणवीस यांच्याशी चर्चा झाल्याचे बोलले जात आहे. पण काँग्रेसचा उमेदवार जाहीर झाल्यानंतरच भाजपकडून सोलापूरची उमेदवारी घोषित होणार असल्याची माहिती आहे.
गेल्या आठवड्यात भाजपने महाराष्ट्रातील लोकसभेच्या २० जागांवरील उमेदवार घोषित केले होते. २०१९ च्या लोकसभा निवडणुकीत जिंकलेल्या जागांचा यात समावेश होता. परंतु विजयी होऊनही उमेदवार जाहीर न झालेल्या तीन जागांमध्ये सोलापूरचा समावेश होता.
विद्यमान खासदार जय सिद्धेश्वर स्वामी यांचा पत्ता कट होण्याची चर्चा सुरुवातीपासूनच होती. सोलापूरमधील मतदारांमध्ये खासदारांविषयी रोष आहे. ते मतदारसंघात दिसत नसल्याची तक्रार वारंवार केली जाते. त्यामुळे भाजपने सोलापूरबाबत सावध भूमिका घेतल्याचे दिसते.
कोण आहेत मिलिंद कांबळे?
मूळ लातूरमधील उदगीरचे रहिवासी असलेल्या मिलिंद कांबळे यांना सोलापूर लोकसभेची उमेदवारी मिळू शकते, असा अंदाज वर्तवला जात आहे. दलित इंडियन चेंबर ऑफ कॉमर्स इंडस्ट्रीजच्या माध्यमातून अनुसूचित जाती आणि जमातीतील उद्योजकांना त्यांनी मदतीचा हात दिला आहे. २०१० पर्यंत पुण्यात त्यांनी भाजपसाठी काम केले होते. ते पुणे शिक्षण मंडळाचे सदस्य देखील राहिले आहेत.
बैठक भाजप-मनसे महायुतीची, विषय उद्धव ठाकरेंचा; अमित शाहांनी राज ठाकरेंना सांगितला २०१९ चा किस्सा
पंतप्रधान नरेंद्र मोदी, देवेंद्र फडणवीस, विनोद तावडे यांच्याशी मिलिंद कांबळे यांचे चांगले संबंध आहेत. २०१३ मध्ये त्यांनी उद्योग विश्वातील कार्यासाठी पद्मश्री पुरस्काराने सन्मानित करण्यात आले होते.
Read Latest Maharashtra News Updates And Marathi News
सोलापूर महापालिकेच्या माजी नगरसेविका संगीता जाधव, नारायण बनसोडे यांच्यासह माळशिरसचे आमदार राम सातपुते, माजी खासदार शरद बनसोडे, प्रशासकीय अधिकारी भारत वाघमारे, उद्योजक राम रेड्डी यांच्या नावांचीही चर्चा होती.