नांदेड: नांदेड जिल्ह्यात आज सकाळी भूकंपाचे सौम्य धक्के जाणवले. सकाळी ६ वाजून ९ मिनिटांदरम्यान भूकंपाचे दोन धक्के जाणवले. भूकंपाचे सौम्य धक्के जाणवल्याने नागरिक भयभीत होउन घरा बाहेर पडले होते. नांदेड शहरासह अर्धापूर, भोकर, हदगाव, नायगाव, मुखेडसह जिल्ह्यात अनेक ठिकाणी धक्के जाणवले. काही गावात भिंतीना तडे गेले. मार्चच्या पहिल्या आठवड्यातही येथे भूकंपाचे धक्के जाणवले होते.
भूकंपाचा केंद्रबिंदू हिंगोलीत
भूकंपाचा केंद्रबिंदू हिंगोली जिह्यातील आखाडा बाळापूरपासून १५ किलोमीटर असून या भूकंपाची तीव्रता ४.२ रिश्टर स्केल असल्याची माहिती प्रशासनाकडून देण्यात आली. या धक्क्यामुळे जिल्ह्यात कुठेही नुकसान झालेलं नाही. नागरिकांनी घाबरून जाऊ नये असे आवाहन जिल्हा प्रशासनातर्फे करण्यात आले आहे.
नांदेड शहरासह ग्रामीण भागात आज पहाटे भूकंपाचा धक्का जाणवला. घरातील वस्तू हादरल्या असून धनेगाव परिसरातील काही भागात टेकड्यांवर असलेल्या पत्र्यांच्या घरावरील मोठे दगड सरकले आहेत. तसेच, बरेचजण फिरण्यासाठी बाहेर पडल्यामुळे त्यांना भूकंपाचा धक्का जाणवला नाही. मालेगाव रोडवरील प्रेम नगर, दीपनगर, श्रीनगर, वजिराबाद, सिडको, हडको भागातील व अनेक परिसरात भूकंप धक्का जाणवला. शिवाय अर्धापूर , भोकर , हदगाव , नायगाव, मुखेडसह जिल्ह्यात अनेक ठिकाणी धक्के जाणवले. काही गावात भिंतीना तडे गेल्याची माहिती आहे. अनेकांनी एकमेकांशी साधला संपर्क. सर्वजण घराबाहेर आले होते. काही काळ नागरिकांध्ये भितीचे वातावरण निर्माण झाले होते. दरम्यान यापूर्वीही नांदेड शहरात भूकंपाचे धक्के जाणवले होते.
हिंगोलीतील रामेश्वर तांडा हे भूकंपाचे केंद्र
२१ मार्च रोजी सकाळी सहा वाजून ९ मिनिटांनी ४.२ रिश्टर स्केलचा भूकंप झाल्याची नोंद राष्ट्रीय भूकंप मापण यंत्रणेवर दिसून आली. हिंगोली जिल्ह्य़ातील वसमत तालुक्यात असलेल्या कुरुंदा व दांडेगावच्या उत्तर भागातील रामेश्वर तांड्याच्या उत्तर भागात भूकंपाचे केंद्र असल्याचे दिसून आले. याची खोली १० किलोमीटर असल्याचे दिसत आहे. पहिल्या धक्क्यानंतर अकरा मिनिटांनी म्हणजे सकाळी सहा वाजून १९ मिनिटांनी लगेचच दुसरा हलका धक्का जाणवला. ३.६ रिश्टर स्केलचा भूकंप झाल्याची नोंद राष्ट्रीय भूकंप मापण यंत्रणेवर दिसून आली. मात्र, या भूकंपाचे केंद्र तीन किलोमीटर दक्षिणेला असलेल्या कुरुंदा आणि दांडेगावच्या रामेश्वर तांड्याच्या दक्षिण भागात असल्याचे दिसून आले. याही भूकंपाची खोली १० किलोमीटर असल्याचे दिसत आहे.