मुंबई/छत्रपती संभाजीनगर: लोकसभा निवडणुकीच्या तारखा निवडणूक आयोगानं जाहीर केल्या आहेत. महायुती आणि महाविकास आघाडीसमोर जागावाटपाचं आव्हान आहे. याशिवाय पक्षांतर्गत नाराजीमुळेही सत्ताधारी आणि विरोधक अडचणीत आहेत. आधीच पक्षफुटीमुळे बॅकफूटवर गेलेल्या उद्धव ठाकरेंसमोर आता छत्रपती संभाजीनगरमध्ये नवी समस्या निर्माण झाली आहे. माजी खासदार आणि विधानपरिषदेचे विरोधी पक्षनेते अंबादास दानवे यांच्यात संघर्ष पेटला आहे. या दोन्ही नेत्यांना उद्धव ठाकरेंनी आज मातोश्रीवर बोलावलं आहे.

छत्रपती संभाजीनगरमध्ये शिवसेनेला सर्वात मोठं खिंडार पडलं. जिल्ह्यातील सगळेच आमदार शिंदेंसोबत गेले. त्यामुळे ठाकरेंची शिवसेना खिळखिळी झाली. त्यातच आता जिल्ह्यातील पक्षाच्या दोन नेत्यांमधील वाद चव्हाट्यावर आला आहे. अंबादास दानवे शिंदेंच्या शिवसेनेत जाणार असल्याची चर्चा सुरू होती. त्यांनी पत्रकार परिषद घेत आपण ठाकरेंची साथ सोडणार नसल्याचं स्पष्ट केलं.
शिंदेंच्या खासदारानं प्रचाराचा नारळ फोडला; भाजपला तोच मतदारसंघ हवा, महायुतीत पेच वाढला
आपण काल ठाकरेंसोबत होतो, आजही त्यांच्यासोबत आहोत आणि पुढेही असू दानवे म्हणाले. पण त्यांनी माजी खासदार चंद्रकांत खैरे यांच्यावर तोफ डागली. चंद्रकांत खैरे मला सतत डावलतात, असं म्हणत त्यांनी खदखद व्यक्त केली. मी २०१४ पासून लोकसभा निवडणूक लढवण्यास उत्सुक आहे. लोकसभेची उमेदवारी मिळावी यासाठी पक्षप्रमुखांकडे मागणी करणं हा माझा अधिकार आहे. याबद्दल उद्धव ठाकरे योग्य तो निर्णय घेतील, अशी अपेक्षा त्यांनी बोलून दाखवली.
चंद्रपुरातील कंपनी छोटी, पण देणगी मोठी; रस्ते न् टोलनाक्याचं ६८८ कोटींचं काम; कंपनी कोणाची?
मी दानवेंना डावललं असतं, तर ते आज इथंवर पोहोचलेच नसते, असं प्रत्युत्तर खैरे यांच्याकडून देण्यात आलं. दानवे आणि खैरे यांच्यातला वाद मिटवण्यासाठी उद्धव ठाकरेंनी त्यांना मातोश्रीवर बोलावलं आहे. आज दुपारी १२ नंतर दोन्ही नेते मातोश्रीवर पोहोचतील. ठाकरे त्यांच्यातील वाद मिटवण्याचा प्रयत्न करतील. पक्षप्रमुखांच्या प्रयत्नांनंतर दोन्ही नेत्यांमध्ये दिलजमाई होणार का, ते पाहणं महत्त्वाचं असेल.