रत्नागिरी : लोकसभा निवडणुकीच्या तोंडावरच महायुतीमधील शिवसेना-भाजपमध्ये जागावाटपावरून भाजपाला खडे बोल सुनावत माजी मंत्री रामदास कदम यांनी मोठी खळबळ उडवून दिली. रत्नागिरी सिंधुदुर्ग, रायगड, मावळ, छत्रपती संभाजीनगर या लोकसभा मतदारसंघांवरून शिवसेना भाजपमध्ये सुरू असलेली धूसफूस चव्हाट्यावर आली आहे. याच पार्श्वभूमीवर मुख्यमंत्री एकनाथ शिंदे यांच्या दापोली दौऱ्यात शनिवारी होणाऱ्या जाहीर सभेला महत्त्व प्राप्त झाल आहे.

रामदास कदम हे मुख्यमंत्र्यांच्या अत्यंत जवळचे नेते मानले जातात. त्यामुळे मुख्यमंत्र्यांनी आपली खदखद रामदास भाईंच्या तोंडून तर व्यक्त केली नाही ना, रामदास कदमांच्या या भूमिकेला मुख्यमंत्र्यांचा आशीर्वाद आहे का? त्यांनी घेतलेल्या भूमिकेची री मुख्यमंत्री जाहीर सभेत ओढणार का? असे काही प्रश्न या निमित्ताने आता उपस्थित झाले आहेत.

रामदास कदम यांनी केलेल्या टीकेची दखल भाजपचे नेते उपमुख्यमंत्री देवेंद्र फडणवीस यांनी घेतली व रामदासभाईंचा हा स्वभाव असल्याचं म्हणत बगल दिली. परंतु याआधी खासदार गजानन कीर्तिकर यांनीही नाराजी व्यक्त केली होती. त्या पाठोपाठ आता रामदास कदमांनीही खदखद व्यक्त केली. रामदास कदम हे मुख्यमंत्र्यांच्या निकटवर्तीयांपैकी एक आहेत. त्यामुळे मुख्यमंत्र्यांची ही खदखद त्यांनी व्यक्त केली का, असाही प्रश्न उपस्थित झाला आहे. इतकेच नव्हे तर रामदास कदम यांनी भाजपवर टीका करताना राष्ट्रवादीचीही पाठराखण केली आहे. त्यामुळे आता या सगळ्यावर मुख्यमंत्र्यांची भूमिका महत्त्वाची ठरणार आहे.
गडकरींनी दिल्लीच्या अहंकाराला लाथ मारुन मविआत यावं, जिंकवण्याची जबाबदारी आमची, ठाकरेंचं आवाहन
दापोली येथील काही मोठ्या विकासकामांचे भूमिपूजन करण्याकरता मुख्यमंत्री येत आहेत. याचवेळी मुख्यमंत्र्यांची जाहीर सभा होणार आहे. मुख्यमंत्री जाहीर सभेत कोणती भूमिका घेतात, याकडे अवघ्या कोकणाचे लक्ष लागलं आहे. शिवसेनेच्या शिंदे गटातील रामदास कदम एक महत्त्वाचे व एकनाथ शिंदे यांच्या अत्यंत जवळचे असलेले ज्येष्ठ आणिविश्वासू नेते म्हणून ओळखले जातात. दापोलीच्या आझाद मैदानात दुपारी दीड वाजता उद्या ही सभा होणार आहे. त्याची जय्यत तयारी सुरू आहे.
रामदास कदम यांना गांभीर्याने घेऊ नये, ‘केसाने गळा कापण्या’वर फडणवीसांची प्रतिक्रिया
दापोली मंडणगड खेड विधानसभेचे विद्यमान आमदार योगेश कदम यांच्या विरोधात मागच्या विधानसभा निवडणुकीत भाजपाने विरोधात काम केले होते. आताही महायुती असतानाही तेच सुरू आहे, असा थेट आरोप रामदास कदम व आमदार योगेश कदम यांनी केला आहे. या सगळ्या अंतर्गत वादावर मुख्यमंत्री अथवा महायुतीचे नेते कोणता तोडगा काढणार का, हेही पाहणे महत्त्वाचे ठरणार आहे. लोकसभेच्या जागावाटपावरून महायुतीमधील धूसफूस समोर आली असतानाच मुख्यमंत्र्यांची जाहीर सभा दापोली येथे होत आहे.

दापोली मध्ये सुमारे ४०० कोटींच्या कामांचे भूमिपूजन होणार असून जाहीर सभा होणार आहे, अशी माहिती दापोली खेड मंडणगडचे आमदार योगेश कदम यांनी दिली. दापोली विधानसभा मतदारसंघातील सुमारे चारशे कोटींच्या विकासकामांचे भूमिपूजन करण्यासाठी मुख्यमंत्री एकनाथ शिंदे शनिवारी येत आहेत.
Read Latest Maharashtra News Updates And Marathi News

या दौऱ्याच्या पार्श्वभूमीवर बोलताना आमदार योगेश कदम यांनी सांगितले की, राज्यात महायुतीचे सरकार राज्यात आल्यानंतर आपण मुख्यमंत्री एकनाथ शिंदे यांना दापोली मतदारसंघातील ज्या प्रमुख काही महत्वाच्या प्रकल्पांना चालना देण्याची विनंती केली होती. त्यापैकी ऐतिहासिक वारसा असलेल्या महत्त्वाचे असलेले हर्णे बंदर आंतरराष्ट्रीय दर्जाचे करण्यासाठी २०५ कोटी रुपयांची तरतूद करण्यात आली आहे. तर दापोली उपजिल्हा रुग्णालय परिसरात १०० खाटांचे नवीन रुग्णालय ज्यामध्ये अतिदक्षता विभाग, रक्तपेढी, डायलिसिस सेंटर आदी सुविधा उपलब्ध असतील त्यासाठी २० कोटी २१ लाख रुपये मंजूर करण्यात आले आहेत. खेड ते दापोली या प्रमुख राज्य मार्गासाठी ९८ कोटी रुपये मंजूर करण्यात आले असून याकोण फाटा ते विसापूर रस्त्यासाठी ३५ कोटींचा निधी मंजूर झाला असल्याचे कदम यांनी सांगितले.