म. टा. खास प्रतिनिधी, मुंबई :
मुंबईतील जवळपास साडेसात लाख ग्राहकांना वीज देणाऱ्या टाटा पॉवर कंपनीने १ हजारहून अधिक ‘हरित ई-वाहन चार्जिंग पॉईंट्स’चे जाळे उभे केल्याचे म्हटले आहे. त्यामध्ये निवासी सोसायट्यांसह व्यावसायिक जागांचाही समावेश आहे. त्यामुळे वाढत्या ई-वाहनांची मोठी समस्या दूर होण्यास मदत होणार आहे.मुंबईच्या रस्त्यांवर आज १० हजारांहून अधिक ई-वाहने धावत आहेत. विद्युत बॅटरीवर आधारित चारचाकी गाड्यांची संख्याही दिवसेंदिवस वाढत आहे. त्यामुळेच टाटा पॉवरने संपूर्ण शहरभरात ई-वाहन चार्जिंग सुविधा जाळे विणण्यासाठी पुढाकार घेतला आहे. ई-वाहन हे पर्यावरणातील कार्बन उत्सर्जन कमी करण्यासाठी असल्याने त्यासाठीची वीजही पर्यावरणपूरक अशी हरित असावी, या उद्देशाने टाटा पॉवरने ‘हरित ई-वाहन चार्जिंग पॉईंट्स’ची संरचना उभी केली आहे. या चार्जिंग पॉईंट्समधून थेट हरित ऊर्जेचा पुरवठा होत नाही. तर या चार्जिंग पॉईंट्ससाठी जेवढ्या विजेची गरज असते किंवा जेवढी वीज वापरली जाते, तितकी हरित ऊर्जा कंपनीकडून खरेदी केली जाते. त्यामध्ये सौर, पवन व जलविद्युत या माध्यमांतून तयार होणाऱ्या प्रदूषणविरहित विजेचा समावेश असतो, असे टाटा पॉवरने ‘महाराष्ट्र टाइम्स’ला सांगितले.
सत्तासंघर्ष निकालातील कागदपत्रे सादर करा, सर्वोच्च न्यायालयाचे नार्वेकरांना निर्देश
राज्यात चार हजार पॉईंट्सचे नियोजन

मुंबईतील सर्व चार्जिंग पॉईंट्स अतिशय मोक्याच्या ठिकाणी असल्याने कंपनीने म्हटले आहे. मुंबई-पुणे महामार्गावरही १९हून अधिक जलद चार्जिंग पॉईंट्स तर मुंबई-गोवा (पुण्यामार्गे) २६ जलद चार्जिंग पॉईंट्स कंपनीने बसविले आहेत. याखेरीज ७३ हजारहून अधिक गृह चार्जर्स, ५३००हून अधिक सार्वजनिक, नीम-सार्वजनिकसह ६९० बस चार्जिंग स्थानके देशभरात उभी करण्यात आली आहेत. येत्या काळात राज्यात टप्प्याटप्प्याने आणखी ४ हजारहून अधिक चार्जिंग पॉईंट्सचे नियोजन करण्यात आल्याची माहिती कंपनीने दिली आहे.
केंद्रे उपलब्ध

मुंबईत १ हजारहून अधिक हरित चार्जिंग पॉईंट्स.

सार्वजनिक ठिकाणी ४४ तर निवासी सोसायट्यांमध्ये ३८५ पॉईंट्स.

मॉल, हॉटेल्स, कार्यालये आदी व्यावसायिक ठिकाणी ५८ पॉईंट्स.

शहर-उपनगरांत ५३१ फिरते चार्जिंग पॉईंट्स.