मुंबई : सध्या राज्याच्या राजकारणात खुर्चीला सर्वाधिक महत्त्व आहे. ज्याची सत्ता त्याला खुर्ची. त्यामुळे या खुर्चीसाठी सत्तेचे राजकारण केले जाते, असं म्हणणं वावगं ठरणार नाही. खुर्चीसाठी नेहमीच सत्ताधारी आणि विरोधकांची ओढाताण सुरू असते. पण राज्य विधिमंडळाच्या नुकत्याच झालेल्या अर्थसंकल्पीय अधिवेशनात एका खुर्चीसाठी वेगळीच गंमत पाहायला मिळाली.
दरवर्षीच्या तुलनेत यंदाच्या अधिवेशनात गर्दी जरा जास्तच होती. परिणामी, विधिमंडळाच्या परिसरात आठवडाभर वर्दळ होती. त्यामुळे विधिमंडळातील तळ मजल्याजवळील वातानुकूलित उपारगृहामध्ये दररोज प्रचंड गर्दी होत होती. सकाळी नाश्ता असो, किंवा दुपारचं जेवण, उपारगृहात जागा मिळवण्यासाठी संगीत खुर्चीची स्पर्धा खेळावी लागत होती.
या ठिकाणी आमदारांना जागा राखीव असली तरी वाढत्या गर्दीमुळे त्यांनाही खुर्चीसाठी धावपळ करावीच लागत होती. या आठवड्यात तर हा नित्याचा कार्यक्रम झाला होता. शुक्रवारी अधिवेशनाचा अखेरचा दिवस असल्याने गर्दी थोडी जास्तच होती. उपारगृहात सगळेच जण खुर्चीसाठी झगडत असतानाच विविध पक्षांतील आमदार याठिकाणी जागा मिळण्यासाठी वाट पाहत बसले होते. यात सत्ताधारी आणि विरोधी पक्षातील आमदारदेखील असल्याने उपस्थित सर्वांचे लक्ष या आमदारांकडे लागून राहिले होते.
Read Latest National News Updates And Marathi News
आमदारांच्या राखीव जागेच्या शेजारील जागा रिकामी झाल्यानंतर सत्ताधारी पक्षांतील दोन आमदार खुर्चीसाठी धावत सुटले. ही खुर्ची आपल्यालाच हवी, असा दावा दोघांकडून सुरू असतानाच विरोधी पक्षातील एक आमदार तिथे अवतरले. ‘अहो, सत्तेची खुर्ची तुमच्याकडेच आहे, आता ही खुर्ची तरी आम्हाला द्या,’ असा टोला लगाविला. अखेर उपहारगृहातील या खुर्चीवर सत्ताधारी आमदारांनी हसत हसत पाणी सोडले.