बारामती: नमो रोजगार मेळाव्याच्या निमित्तानं बारामतीमध्ये आज शासकीय कार्यक्रमाचं आयोजन करण्यात आलं आहे. या सोहळ्याला मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, खासदार शरद पवार, सुप्रिया सुळे, मंत्री उदय सामंत, मंगलप्रभात लोढा, दिलीप वळसे पाटील अशा दिग्गजांची उपस्थिती आहे. या सोहळ्याच्या निमित्तानं अजित पवार आणि शरद पवार एकाच व्यासपीठावर उपस्थित आहेत.

बारामतीमध्ये आयोजित मेळाव्यात घडलेल्या घडामोडी चर्चेचा विषय ठरल्या आहेत. या सोहळ्यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार व्यासपीठावर आले. त्यावेळी मंचावर खासदार सुप्रिया सुळे आधीपासूनच उपस्थित होत्या. त्यांनी मुख्यमंत्री शिंदेंचं नमस्कार करुन स्वागत केलं. पण त्यांच्या मागोमाग मंचावर आलेल्या अजित पवारांकडे बघणं सुळेंनी टाळलं. अजित पवारांच्या शेजारी असलेल्या फडणवीसांना त्यांनी नमस्कार केला. काही वेळ दोघांमध्ये संवादही झाला. यावेळी सुळे अजित पवारांकडे पाठ करुन उभ्या होत्या.
फडणवीसांशी गप्पा, शिंदेंची घेतली गाठ; सुप्रिया ताईंची अजितदादांकडे पाठ, नजरानजरही टाळली
राज्यसभेचे खासदार असलेल्या शरद पवारांनी सोहळ्यात भाषण केलं. विकासकामांच्या बाबतीत आमचा सरकारला कायम पाठिंबा असेल असं पवार म्हणाले. यानंतर अजित पवार भाषणाला उभे राहिले. कौशल्य विकास मंत्रालयाच्या वतीनं आजचा कार्यक्रम आयोजित करण्यात आल्यानं अजित पवारांनी त्यांच्या भाषणात या खात्याचे मंत्री असलेल्या मंगलप्रभात लोढा यांचा अनेकदा उल्लेख केला.
नमो महारोजगार मेळाव्यात शरद पवारांची एन्ट्री, बारामतीकरांचा जल्लोष, अजितदादांचा चेहरा पडल्याची चर्चा
मंत्री मंगलप्रभात लोढा यांच्या नावाचा उल्लेख करताना अजित पवार दोनदा चुकले. त्यांनी मंगलप्रभात नावाचा उल्लेख दोनदा मंगलप्रसाद असा केला. दोनदा त्यांनी स्वत:ची चूक सुधारली. अखेर भाषणात तिसऱ्यांदा त्यांचं नाव आल्यानंतर अजित पवारांनी मंत्र्यांचं नाव घेणं टाळलं. त्यांनी केवळ लोढा असा उल्लेख केला आणि चुकीची पुनरावृत्ती होणार नाही याची काळजी घेतली.