पुणे : गेल्या काही दिवसांपासून शिरूर लोकसभेतून सलग तीनदा लोकसभेवर जाणारे शिवाजीराव आढळराव पाटील चांगलेच चर्चेत आहेत. मुख्यमंत्री एकनाथ शिंदे यांनी आढळराव पाटील यांना म्हाडाचे अध्यक्षपद दिल्याने त्यांचा शिरूर लोकसभेचा पत्ता कट झाल्याच्या चर्चा आहेत. मात्र मी लोकसभा लढविणारच असा प्रण आढळराव पाटील यांनी केला आहे. परंतु महायुतीत ही जागा राष्ट्रवादीकडे असल्याने अजित पवार गटाला संबंधित जागा मिळेल, अशी शक्यता आहे. याच पार्श्वभूमीवर आढळराव पाटील हे अजित पवार यांच्या गटात प्रवेश करतील, अशी अटकळही बांधली जातीये.
आतापर्यंत एकमेकांचे कट्टर राजकीय विरोधक असलेले खेडचे आमदार दिलीप मोहिते पाटील यांनी आढळरावांच्या संभाव्य राष्ट्रवादी प्रवेशावर आपली प्रतिक्रिया देताना तीव्र नाराजी व्यक्त केलीये. आढळराव पाटील अजित पवार गटात येणार असतील आणि पक्ष त्यांचं स्वागत करणार असेल तर मी माझा निर्णय घेईल, असे वक्तव्य दिलीप मोहिते पाटील यांनी केले आहे. मुंबई येथे माध्यमांशी बोलताना त्यांनी ही प्रतिक्रिया दिली असून मी आढळराव यांच्यासोबत २० वर्ष संघर्ष केला आहे. त्यामुळे ते जर पक्षात आले तर मी राजकारण सोडून घरी बसेन असा इशाराच मोहिते पाटील यांनी दिला आहे.
“आढळराव पाटील यांचं स्वागत करायचं की नाही हा जर-तरचा भाग आहे. आम्ही आयुष्यभर त्यांना विरोध केला आहे. राजकारण हे तत्वाकरिता करावं. आयाराम गयारामांचं राजकारण झालं तर राजकारणाला काही अर्थ उरणार नाही. तसं राजकारण मला करायचं नाही”, असं मोहिते पाटील म्हणाले.
आधी लोकसभेच्या जागेवरुन थेट अजितदादांना इशारा, आता मुख्यमंत्री ठरवतील तो अंतिम निर्णय म्हणत आढळरावांचा यू-टर्न
पुढे बोलताना ते म्हणाले, “आमचा पक्ष जर आढळरावांचं स्वागत करणार असेल तर मी त्यावर काही बोलणार नाही. शेवटी पक्ष आणि पक्षप्रमुख अजित पवार त्यांचा निर्णय घेतील. परंतु, मी माझे वैयक्तिक निर्णय घेईन. माझ्या वैयक्तिक जीवनात काय करायचं हा निर्णय घेईन”
शिरुरमध्ये अजितदादांनी हुकमी एक्का काढला, शरद पवारांचं पॅनल पाडणाऱ्याला थेट खासदारकीचं तिकीट?
शिवसेना संघर्षाच्या काळात आढळराव पाटील यांनी ठाकरेंशी फारकत घेऊन शिंदे गटात गेले. शिरूर लोकसभा आपल्याला लढवायची आहे, मात्र शिरुरच्या जागेवर अजित पवार यांनी दावा केला आहे. ती जागा अजित पवार यांच्याच वाट्याला येणार असल्याचे बोलले जात आहे. त्यामुळे आढळराव पाटील हे अजित पवार यांच्यासोबत जाण्याची मनाने तयारी करत आहेत. मात्र जसे त्यांच्या संभाव्य पक्षप्रवेशाचं वृत्त आले, त्याचवेळी आमदार दिलीप मोहिते यांनी विरोध दर्शवला आहे. त्यामुळे याबाबत अजित पवार याबाबत काय भूमिका घेणार हे पाहणे महत्त्वाचे ठरणार आहे.