म. टा. प्रतिनिधी, नागपूर : ‘केंद्रात बहुमत असताना एनडीएमध्ये १४ ते १८ पक्षांना सामावून घेत सन्मानाचे स्थान देण्यात येत आहे. भाजप हा आपल्यासोबत असलेल्या लहान पक्षांना सांभाळणारा व सन्मान देणारा पक्ष आहे. या पक्षात भरपूर जागा असून, जे मोदींच्या गॅरंटीवर विश्वास ठेवून येथे येतील, त्या सर्वांना प्रवेश देऊ, असे भाजपचे प्रदेशाध्यक्ष चंद्रशेखर बावनकुळे यांनी स्पष्ट केले.
चंद्रशेखर बावनकुळे रविवारी नागपुरात प्रसारमाध्यमांशी बोलत होते. एनडीमध्ये लहान पक्षांना सामावून घेत आजपर्यंत सन्मानाचे स्थान देण्यात आले. देवेंद्र फडणवीस मुख्यमंत्री असताना महादेव जानकर, सदाभाऊ खोत यांना महत्त्वाची खाती दिली. बच्चू कडू यांना महाविकास आघाडीमध्ये जितका सन्मान मिळाला नाही, त्यापेक्षा अधिक सन्मान महायुती काळात मिळत आहे. पक्ष वाढवण्याची जबाबदारी माझ्यावर आहे. त्यामुळे जे कोणी येतील, त्यांना सन्मानाचे स्थान देण्यात येईल, असेही त्यांनी सांगितले.
विरोधकांवर टिकास्त्र
‘शरद पवार आणि काँग्रेसने नेहमीच लहान पक्ष संपविण्याचे काम केले आहे. विरोधकांना विकासावर काहीच बोलता येत नाही. त्यामुळे सकाळी उठून ते ‘नॅरेटिव्ह सेट’ करतात, असे विरोधकांवर टीका करताना ते म्हणाले. विरोधी पक्षाच्या नेत्यांनी विकासावर बोलावे, असे आव्हानही त्यांनी दिले.