पुणे : पुणे पोलीस आयुक्त अमितेशकुमार यांनी आयुक्तपदाचा चार्ज घेतल्यानंतर देशातला सगळ्यात मोठा ड्रग्स साठा उध्वस्त केला आहे. याबाबत काल राज्याचे गृहमंत्री देवेंद्र फडणवीस यांनी २५ लाखांचा धनादेश देऊन पुणे पोलिसांचा सत्कारही केला. परंतु इतकी मोठी कारवाई करूनही पुण्यात ड्रग्स सेवन करणाऱ्यांना ड्रग्स सहजपणे उपलब्ध होत असल्याचं चित्र आज एका व्हिडिओच्या माध्यमातून समोर आलं आहे. मराठी चित्रपट अभिनेता मुळशी पॅटर्न फेम रमेश परदेशी यांनी एक व्हिडिओ लाइव्ह करून नशेच्या धुंदीत असलेल्या दोन मुलीची अवस्था समोर आणली आहे. त्यामुळे राज्यात नव्हे तर देशभरात जात ड्रग्सची कारवाई करणाऱ्या पुणे पोलिसांच्या मशाली खालीच अंधार असल्याची चर्चा आता सगळीकडे होऊ लागली आहे.याबाबत अधिक माहिती अशी की, पुण्यातील कोथरूड परिसरातील प्रसिद्ध वेताळ टेकडीवर दोन मुली दारू आणि ड्रग्सच्या नशेत धुंद असलेल्या अवस्थेत असल्याचा प्रकार रमेश परदेशी यांनी फेसबुक लाइव्ह करून दाखवला आहे. या लाइव्हमधील दिसणाऱ्या मुलीमध्ये एक झोपलेल्या अवस्थेत आहे. तर दुसऱ्या मुलगी शुद्ध हरपल्याच्या अवस्थेत दिसून येत या परिस्थितीत रमेश परदेशी यांनी टेकडीवर आलेल्या नागरिक आणि तरुणांच्या मदतीने मुलींच्या चेहऱ्यावर पाणी मारलं आणि जाग करण्याचा प्रयत्नही केला. यानंतर या मुलींना रूग्णालयात दाखल करण्यात आले आहे.
रमेश परदेशींचा पुणेकरांना इशारा
शिक्षणाचं आणि संस्कृतीचं माहेरघर असलेलं पुणे शहर हे आता नशेचं माहेरघरं होतंय का? याचा आपल्याला गंभीरपणे विचार करायला लागेल. पुण्यातील टेकड्यांवर लोक आपलं शरीर सांभाळण्यासाठी येतात तिथं ही तरुण मुलं मुली अशा प्रकारे नशा करतात. आपल्या आई-वडिलांना माहिती नसतं की मुलं बाहेर नक्की काय करतात त्यामुळं आपण एक पालक, सजग नागरिक, भाऊ, बहिण म्हणून आपण याकडं गांभीर्यानं बघणार आहोत की नाही. यामुळं तरुण पिढी बरबाद होत आहे त्यामुळे जर आत्ताच काही केलं नाहीतर पुण्याचा उडता पंजाब व्हायला वेळ लागणार नाही, असा इशारा रमेश परदेशी यांनी पुणेकरांना दिला आहे.
ड्रग्जचे आतंरराष्ट्रीय रॅकेट मोडून काढणारे पुणे पोलीस विद्यार्थ्यांना नशेच्या जाळ्यात ओढणाऱ्यांवर काय कारवाई करणार हे पाहणं महत्त्वाचं असणार आहे