म. टा. प्रतिनिधी, छत्रपती संभाजीनगर : चार वर्षांच्या खंडानंतर छत्रपती संभाजीनगर विमानतळावरून अहमदाबाद शहरासाठी पुन्हा एकदा विमान कनेक्शन सुरू केले जाणार आहे. आगामी ३१ मार्चपासून इंडिगो विमान कंपनीची अहमदाबाद-छत्रपती संभाजीनगर-अहमदाबाद हे विमान नियमित सुरू केले जाणार आहे. यामुळे छत्रपती संभाजीनगर विमानतळाचे दिल्ली, कर्नाटकनंतर गुजरातसाठी विमान कनेक्शन उपलब्ध होणार असल्याची माहिती विमानतळ संचालक शरद येवले यांनी दिली.
छत्रपती संभाजीनगर विमानतळावरून करोनापूर्व काळात स्पाइस जेट, ट्रु जेट, एअर इंडिया आणि इंडिया या विमान कंपन्यांकडून विविध मार्गांवर विमानसेवा सुरू करण्यात आल्या होत्या. यात मुंबई, दिल्ली, हैदराबाद, बेंगळुरूसह अहमदाबाद या शहरांसाठी विमान कनेक्शन उलपब्ध करून देण्यात आले होते. या विमानांना चांगला प्रतिसाद मिळत होता. अहमदाबाद शहरासाठी सर्वप्रथम ट्रु जेट कंपनीने विमान सुरू केले होते. त्यापाठोपाठ स्पाइस जेटनेही या मार्गावर विमान सुरू केले होते. छत्रपती संभाजीनगरला गुजरातशी जोडणारी हवाई सेवा सुरू झाल्याने शहरातील व्यावसायिकांसह इतर उद्योजकांनाही याचा फायदा झाला होता. मात्र, करोनाकाळात अहमदाबादची विमानसेवा बंद करण्यात आली होती.
अहमदाबाद शहरासाठी विमान कनेक्शन पुन्हा सुरू व्हावे. अशी उद्योजक; तसेच व्यापाऱ्यांकडून वारंवार मागणी केली जात होती. याबाबत इंडिगो विमान कंपनीशी चर्चा करण्यात आली होती. इंडिगो विमान कंपनीने आगामी ३१ मार्चपासून अहमदाबाद-छत्रपती संभाजीनगर-अहमदाबाद हे विमान नियमित चालविण्याचा निर्णय जाहीर केला. यामुळे पुन्हा एकदा मराठवाड्यातील व्यापारी, व्यावसायिक आणि उद्योजकांना अहमदाबादला जाण्यासाठी विमान उपलब्ध करण्यात आले आहे, अशी माहिती विमानतळ संचालक शरद येवले यांनी दिली.
असे वेळापत्रक राहणार
अहमदाबाद-छत्रपती संभाजीनगर हे विमान अहमदाबादहून सायंकाळी पाच वाजता छत्रपती संभाजीनगरकडे उड्डाण करणार आहे. हे विमान छत्रपती संभाजीनगरला सायंकाळी ६.५० वाजता उतरेल. छत्रपती संभाजीनगरहून हे विमान सायंकाळी ७.१० वाजता उड्डाण करून, रात्री ८.५५ वाजता अहमदाबादला पोचणार आहे.
आणखी विमान उड्डाणांसाठी प्रयत्न
विमानतळ संचालक शरद येवले यांनी या पदाचा कार्यभार स्वीकारल्यानंतर, मुंबईसाठी सायंकाळचे विमान पुन्हा सुरू करण्यात त्यांना यश आले. अहमदाबादसाठीचे विमान सुरू झाल्यानंतर, आगामी काळात दिल्ली आणि मुंबईसाठी विमाने वाढविण्यासह इतर महत्त्वाच्या शहरांशी छत्रपती संभाजीनगरचे विमान कनेक्शन वाढविण्यासाठी त्यांनी प्रयत्न सुरू केले आहे.