गुरुबाळ माळी, कोल्हापूर : महाविकास आघाडी अंतर्गत कोल्हापूरची जागा काँग्रेसलाच सुटल्याचे स्पष्ट झाले आहे. त्यामुळेच या पक्षाने पुढाकार घेऊन आघाडीतील सर्व मित्र पक्षांच्या नेत्याची बैठक घेतली आणि लोकसभा निवडणुकीची रणनीती आखली. पक्षाचे जिल्हाध्यक्ष आमदार सतेज पाटील यांनी यामध्ये पुढाकार घेतल्याने ही जागा कुणाला मिळणार याबाबतची संभ्रम दूर झाला आहे.महाविकास आघाडी अंतर्गत कोल्हापूर लोकसभा जागेवर शिवसेना उद्धव ठाकरे गट, राष्ट्रवादी शरद पवार गट आणि काँग्रेसनेही दावा केला आहे. दोन्ही खासदार शिवसेनेच्या चिन्हावर निवडून आल्याने या जागा आमच्याच आहेत असे ठाकरे गटाच्या वतीने सांगण्यात येते. गेले वीस वर्षे या जागेवर राष्ट्रवादी लढत असल्याने ही जागा आमचीच असल्याचे राष्ट्रवादीचे नेते सांगतात. तर या मतदारसंघात काँग्रेसचे पाच आमदार असल्याने ही जागा आम्हालाच मिळायला हवी असा आग्रह या पक्षाने धरला आहे. यामुळे ही जागा नेमकी कोणाला मिळणार याबाबत तर्कवितर्क लढवले जात आहेत.
या सर्व काँग्रेसने पुढाकार घेऊन बैठक घेतल्याच्या पार्श्वभूमीवर ही जागा आता काँग्रेसलाच सुटल्याचे स्पष्ट झाले आहे. श्रीमंत शाहू महाराज छत्रपती यांनी अप्रत्यक्षरीत्या उमेदवारी बाबत होकार दिल्याने काँग्रेसने लोकसभा निवडणुकीची रणनीती आखण्यास सुरुवात केली आहे. जागा मिळणार हे निश्चित झाल्यानेच तातडीने आघाडीतील सर्व घटक पक्षांच्या नेत्यांची काँग्रेस कमिटीत बैठक घेतली.
या बैठकीस शिवसेना, राष्ट्रवादी, जनता दल, शेकाप, माकप, भाकप यासह या अनेक पक्षांचे नेते उपस्थित होते. लोकसभेची जागा जिंकण्यासाठी काय काय करता येईल, प्रचार कसा करता येईल यासंदर्भात सर्वांची मते जाणून घेण्यात आली. काँग्रेसचे जिल्हाध्यक्ष सतेज पाटील यांनी पुढाकार घेऊन ही बैठक घेतली. ज्या अर्थी काँग्रेसने पुढाकार घेतला आहे याचा सरळ अर्थ ही जागा याच पक्षाला मिळाल्याचे स्पष्ट होते. या पक्षाकडे शाहू महाराजांच्या रूपाने मिळालेले सक्षम उमेदवार, तीन मतदारसंघात असलेली काँग्रेसची ताकद, सतेज पाटील यांची यंत्रणा आणि व्यूहरचना यामुळेच ही जागा काँग्रेसला सोडले असल्याचे बोलले जात आहे.
या बैठकीस काँग्रेसचे शहराध्यक्ष सचिन चव्हाण, राष्ट्रवादीचे जिल्हाध्यक्ष व्ही.बी. पाटील, शहराध्यक्ष आर. के. पोवार, शिवसेनेचे जिल्हाध्यक्ष संजय पवार, विजय देवणे, रविकिरण इंगवले, सुनील मोदी, संजय चौगुले, वैभव उगळे, शिवाजीराव परुळेकर यांच्यासह अनेक पदाधिकारी उपस्थित होते.