नागपूर: दिवसभर ऊन आणि रात्री-पहाटे हलकीशी थंडी असे सध्याचे विचित्र वातावरण सुरू आहे. या वातावरणाला उन्हाळा म्हणावा की हिवाळा, असा प्रश्न पडलेला असतानाच खरबूज (डांगर) आणि टरबूज ही दोन रसाळ फळे एप्रिलपूर्वीच बाजारात विक्रीसाठी उपलब्ध आहेत. साधारणपणे उन्हाळा सुरू झाला की, हमखास खरबूज आणि टरबूज या दोन फळांचा आनंद घेण्यात येतो. एप्रिल महिन्यात चांगल्या प्रतीचे खरबूज आणि टरबूज विक्रीसाठी उपलब्ध होते.
नवं घर बांधणाऱ्यांसाठी गुड न्यूज, हवी तेवढी वाळू खरेदी करा,धोरण बदललं आता किती पैसे मोजावे लागणार,वाचा सविस्तर
यंदा, जसे ऋतू वेळेच्या आधी येताहेत किंवा निर्धारित वेळेपेक्षा अधिक लांबताहेत त्याचप्रमाणेच फळांचे झाले आहे. एप्रिल लागण्यापूर्वीच खास उन्हाळी फळ म्हणावे अशा खरबूज आणि टरबूजची आवक नागपुरात सुरू झाली आहे. कॉटन मार्केटमधील विक्रेत्यांनी दिलेल्या माहितीनुसार, छत्रपती संभाजीनगर आणि नांदेड येथून मोठ्या प्रमाणात खरबूज आणि टरबूजची आवक सुरू आहे. सध्या रस्त्यालगत बसणाऱ्या विक्रेत्यांकडे खरबूज-टरबूज विक्रीसाठी उपलब्ध आहेत. तेव्हा दिवसभर जाणवणारी उन्हाची काहीली शमविण्यासाठी या फळांचा आस्वाद घेण्याची चांगली संधी नागपूरकरांना प्राप्त झाली आहे.

सध्या टरबूज आणि खरबूजचा दर प्रतिकिलो शंभर रुपये आहे. गुढीपाडव्यानंतर उन्हाळा जसजसा तापायला सुरुवात होईल तसतसा या दोन्ही फळांचा दर कमी होणार आहे. नागपुरात खरबूजऐवजी डांगर वा डांगरू असे म्हणण्याची पद्धत आहे. साधारणपणे मलकापुरी डांगरला चांगली मागणी असते. अद्याप मलकापुरी डांगराची आवक सुरू झालेली नाही.