सोलापूर: वाळूजच्या बजाजनगर येथील एका अकॅडमीमध्ये पोलिस भरतीची तयारी करणाऱ्या १९ वर्षीय तरुणीने वसतिगृहात गळफास घेऊन आत्महत्या केल्याची घटना मंगळवारी सकाळी उघडकीस आली आहे. लीना श्रीराम पाटील (वय १९, रा. सावखेडा, ता. पाचोरा, जि. जळगाव) असे आत्महत्या करणाऱ्या तरुणीचे नाव असून, तिच्या आत्महत्येचे कारण समजू शकले नाही.

वाळूज महानगर येथे नीलेश सोनवणे यांच्या गरुडझेप अकॅडमीमध्ये पोलिस आणि सैन्य भरतीचे प्रशिक्षण दिले जाते. या ॲकॅडमीचे आम्रपाली बुद्धविहाराच्या मागे मुलींचे वसतिगृह आहे. तेथून मुली क्लाससाठी मोरे चौकातील ॲकॅडमीत बसने ये-जा करतात. मंगळवारी सकाळी नऊच्या सुमारास लीना क्लासला गैरहजर असल्याने शिक्षकाने वसतिगृहाच्या वॉर्डन मीरा सत्वधर यांच्याकडे विचारणा केली. त्यामुळे मीरा यांनी लीना हिच्या खोलीत पाहिले. मात्र, ती दिसली नाही.

शोधाशोध करीत असताना टेरेसवरील बाथरुमचा दरवाजा बंद असल्याचे दिसले. दरवाजा ठोठावूनही उघडला जात नसल्याने दरवाजा उघडला गेला नाही. त्यामुळे त्यांनी अकॅडमीचे संचालक नीलेश सोनवणे यांना आणि पोलिसांना माहिती दिली. सहायक पोलिस निरीक्षक गौतम वावळे, उपनिरीक्षक संदीप शिंदे व कर्मचाऱ्यांनी घटनास्थळी बाथरूमचा दरवाजा तोडला. त्यावेळी लीनाने गळफास घेऊन आत्महत्या केल्याचे दिसून आले. तिला घाटी रुग्णालयात दाखल केले असता डॉक्टरांनी लीनाला तपासून मृत घोषित केले. या प्रकरणी वाळूज एमआयडीसी पोलिस ठाण्यात आकस्मिक मृत्यूची नोंद करण्यात आली असून, पुढील तपास उपनिरीक्षक अशोक इंगोले करीत आहेत.

अकॅडमीत यापूर्वीही आत्महत्येची घटना

गरुडझेप ॲकॅडमीत २८ डिसेंबर रोजी श्रीकांत दशरथ वाघ (वय १८, रा. निपाणी आडगाव, ता. छत्रपती संभाजीनगर) या पोलिस भरतीची तयारी करणाऱ्या तरुणाने ॲकॅडमीच्या बाथरूध्ये गळफास घेऊन आत्महत्या केली होती. ही घटना ताजी असतानाच मंगळवारी पुन्हा लीना पाटील या तरुणीने तशाच पद्धतीने बाथरूममध्ये गळफास घेऊन आत्महत्या केल्याने परिसरात खळबळ उडाली आहे.