नाशिक: नाशिक पोलिस दलात खळबळ उडवणारी घटना समोर आली आहे. नाशिक पोलिस आयुक्तालयाच्या अंतर्गत येणाऱ्या अंबड पोलिस ठाण्यात पोलिस अधिकाऱ्याने स्वतःवर गोळी झाडून घेत आत्महत्या केल्याची धक्कादायक घटना घडली आहे.नाशिक शहरातील अंबड पोलिस ठाण्यात गुन्हे शाखेत पोलिस निरीक्षक पदावर कार्यरत असलेल्या अशोक नजन (वय ४०) या पोलिस अधिकाऱ्याने पोलिस ठाण्यातच स्वतःच्या केबिनमध्ये आज सकाळी दहा वाजेच्या सुमारास स्वतःच्या पिस्तूलमधून स्वतःच्या डोक्यात गोळी झाडत आत्महत्या केली आहे .मात्र त्यांनी ही आत्महत्या का केली याचे कारण अद्याप समोर आलेलं नाही.

दरम्यान, या घटनेची माहिती मिळताच वरिष्ठ पोलिस अधिकारी अंबड पोलिस ठाण्यात दाखल झाले असून त्यांच्याकडून या संपूर्ण घटनेची माहिती घेण्याचे काम सुरू आहे. या प्रकरणाचा पुढील तपास आता पोलिसांकडून सुरू असून काल बंदोबस्तासाठी तैनात असलेल्या अधिकाऱ्याने अचानक आत्महत्या केल्याने नाशिक शहरात खळबळ उडाली आहे. पोलिस ठाण्यातच पोलिस अधिकाऱ्याने बंदुकी मधून स्वतःवर गोळी झाडून घेतल्याने अनेक तर्कवितर्क लावले जात आहेत.
पोलिस अधिकाऱ्याने पोलिस ठाण्यात गोळी झाडून आत्महत्या केल्याची वार्ता परिसरात वाऱ्यासारखी पसरल्यानंतर पोलिस ठाण्याच्या परिसरात नागरिकांनी एकच गर्दी केली आहे. ऑन ड्युटी पोलिस ठाण्यात आत्महत्या केल्याने अचंबिले जात आहे.