नांदेड: मनोज जरांगे पाटील यांच्या उपोषणाला पाठिंबा व्यक्त करण्यासाठी मराठा आंदोलकांकडून ठिकठिकाणी आंदोलन केले जात आहे.आंदोलनादरम्यान रास्ता बंद देखील करण्यात येतं आहे. त्यामुळे खबरदारी म्हणून जिल्ह्यातील बस सेवा बंद करण्यात आली आहे.सलग तिसऱ्या दिवशी ही बस सेवा बंद असून एसटी महामंडळाचे जवळपास ८० लाखांपेक्षा अधिक नुकसान झाल्याची माहिती आहे.

मराठा समाजाच्या आरक्षणच्या मागणीसाठी अंतरवाली सराटी येथे जरांगे पाटील यांचे उपोषण सुरु आहे. त्यांची प्रकृती देखील खालवत आहे. शासनाकडून कुठलाच निर्णय घेतला जात नसल्याचा आरोप करत मराठा समाज आक्रमक झाला आहे. याच पार्श्वभूमीवर जरांगे यांच्या समर्थनार्थ नांदेड जिल्ह्यात ठिकठिकाणी आंदोलने केली जात आहेत. मराठा आंदोलकाकडून रास्ता रोको केलं जात आहे. त्यामुळे अनेक मार्गावरील वाहतूक ठप्प झाली आहे. या दरम्यान अनुचित प्रकार होऊ नये म्हणून एसटी महामंडळाकडून बस सेवा बंद करण्याचा निर्णय घेण्यात आला. शुक्रवारपासून बस सेवा बंद आहे.

शासनाचे एक कोटी ‘वळवले’, ओडिशा ‘एसडब्ल्यूओ’ कार्यालयाची फसवणूक; नाशिकच्या दोघांविरुद्ध गुन्हा
शुक्रवारी लांब पल्याच्या गाड्या रद्द करण्यात आल्या होत्या. त्यानंतर शनिवारी सकाळपासून जिल्ह्यातील नऊ डेपोतील वाहतूक बंद करण्यात आली. रविवारीदेखील बस सेवा बंद आहे. या बंदमुळे बस स्थानकात शुकशुकाट पहावयास मिळत आहे. दरम्यान या तीन दिवसात एसटी महामंडळाचे जवळपास ८० ते ८५ लाख रुपयांचे नुकसान झाल्याचे एसटी महामंडळाच्या वतीने सांगण्यात आले. ऐन लग्न सराईत एसटी महामंडळाची सेवा बंद असल्याने प्रवाशांना नाहक त्रास सहन करावा लागत आहे. बसेस बंद ठेवल्यामुळे खासगी वाहतूकदारांची चांदी झाली आहे.

सकल मराठा समाजा तर्फे आमदारांना निवेदन

२० फेब्रुवारी बोलण्यात आलेल्या विशेष अधिवेशनात सगेसोयरे कायद्याच्या अमलबजावणीसाठी आवाज उठवावा अशी विनंती सकल मराठा समाजा तर्फे लोकप्रतिनिधींकडे करण्यात आली. याच संदर्भात सकल मराठा समाजाच्या वतीने काँग्रेसचे आमदार मोहन हंबर्डे आणि शिवसेनेचे आमदार बालाजी कल्याणकर यांना निवेदन देखील देण्यात आले.