पुणे: पुण्यात आंबेगाव तालुक्यातील मंचरजवळ भीषण अपघात झाला आहे. कार – टेम्पो – कंटेनरच्या विचित्र अपघातात तिघांचा जळून मृत्यू झाला आहे. आज पहाटेच्या सुमारास हा अपघात झाला, ही घटना पुणे-नाशिक राष्ट्रीय महामार्गावर मंचरच्या दक्षिण बाजूला तीन किलोमीटर अंतरावर भोरवाडी तांबडे मळा या ठिकाणी सकाळच्या सुमारास घडली.

सुदैवाने या अपघातातून स्विफ्ट कारचा चालक आणि टेम्पोचा चालक थोडक्यात बचावले आहेत. या अपघातात मृत पावलेल्यांची नावे अद्याप समजू शकलेली नाहीत. मात्र, मृत झालेले तिघे खेड तालुक्यातील राक्षेवाडी येथील असल्याचे समजत आहे.

याबाबत अधिक माहिती अशी की, शनिवारी पहाटेच्या सुमारास पुणे – नाशिक महामार्गावर पुण्याकडे जाणाऱ्या मार्गावर एक कंटेनर बंद पडला होता. रस्त्याच्या कडेला हा बंद कंटेनर उभा होता. याच मार्गावर टेम्पो आणि स्विफ्टकारमध्ये आधी जोरदार धडक झाली. त्यानंतर टेम्पो पुढे रस्त्याच्या कडेला उभ्या असलेल्या कंटेनरवर धडकला. धडक होताच स्विफ्ट कारने पेट घेतला. कारने पेट घेतल्यामुळे कारमध्ये बसलेल्या लोकांना बाहेर पडता आले नाही. त्यामुळे कारमधील तिघांचा होरपळून मृत्यू झाला. मात्र, या अपघातात सुदैवाने कार चालक आणि टेम्पो चालक बचावले आहेत.

हा अपघात एवढा भयानक होता की, कारने जागेवर पेट घेतला त्यामुळे कारमधील व्यक्तींना बाहेर पडण्याची संधीच मिळाली नाही. त्यात तिघांचा होरपळून मृत्यू झाला आहे. या घटनेने महामार्गावर बघ्यांची गर्दी झाली होती. अचानक झालेल्या अपघातामुळे मृत्यांच्या कुटुंबियांवर दुःखाचा डोंगर कोसळला आहे. या प्रकरणाचा पोलिसांकडून अधिक तपास केला जात आहे.