म. टा. प्रतिनिधी, पुणे: पुणे मेट्रोची प्रवासी संख्या वाढविण्यासाठी सध्या कार्यान्वित २० स्टेशनपैकी आठ स्टेशनवर ‘पार्किंग’ची सुविधा उपलब्ध करण्यात आली असून, महाराष्ट्र मेट्रो रेल्वे कॉर्पोरेशनने (महामेट्रो) त्याचे दर निश्चित केले आहेत. मात्र, मेट्रोच्या तिकिटापेक्षा पार्किंगचे दर अधिक असल्याने नागरिक मेट्रोने जाण्याऐवजी दुचाकी-चारचाकी घेऊनच जातील, अशी भीती व्यक्त केली जात आहे.

महामेट्रोने मेट्रो स्टेशनवर पार्किंग सुविधा उपलब्ध करून देण्याची मागणी सातत्याने केली जात होती. सध्या कार्यान्वित स्टेशनपैकी काही ठिकाणी नागरिक दुचाकी-चारचाकी पार्क करून मेट्रोने जात होते. मेट्रो कार्यान्वित झाल्यापासून मोफत स्वरूपातील या पार्किंगसाठी आता दर निश्चित करण्यात आले आहेत. या दरांमुळे सध्या गाडी लावून पुढे जाणाऱ्या प्रवाशांवर मेट्रो तिकिटापेक्षा अधिक भार पडणार असून, हे पार्किंग शुल्क मेट्रोने प्रवास करणाऱ्यांच्या सोयीसाठी आहे, की त्यांनी मेट्रोचा वापर न करता खासगी वाहनांचा वापर करावा यासाठी आहे, असा प्रश्न नागरिकांकडून उपस्थित केला जात आहे.

या स्थानकांवर सशुल्क पार्किंग

‘मार्गिका-१’वरील स्थानके

पिंपरी-चिंचवड, संत तुकारामनगर, फुगेवाडी, बोपोडी, शिवाजीनगर

‘मार्गिका-२’वरील स्थानके

आयडियल कॉलनी, मंगळवार पेठ (आरटीओ)

शिवाजीनगर न्यायालय (सिव्हिल कोर्ट) या इंटर-चेंज स्टेशनवरही पार्किंग उपलब्ध

वाहनतळावर या सुविधा

– सर्व ठिकाणी बूम बॅरियर, सीसीटीव्ही कॅमेरा

– ॲप आणि डिजिटल पेमेंटच्या माध्यमातून शुल्क भरण्याची सोय

– पार्किंग क्षमता दाखविणारे फलक

– मेट्रोने प्रवास करणाऱ्या प्रवाशांना २५ टक्के सवलत

असे आहे शुल्क (रुपयांत)

वेळ सायकल दुचाकी चारचाकी

२ तासांपर्यंत २ १५ ३५

२ ते ६ तासांपर्यंत ५ ३० ५०

६ तासांपासून पुढे १० ६० ८०

पार्किंगसाठी नफेखोरी नको

सध्या कार्यान्वित मार्गावर महामेट्रोचे कमाल तिकीट दर ३५ रुपये आहे; परंतु या मार्गाने प्रवास करणाऱ्या एखाद्या दुचाकीस्वाराला दोन तासांपेक्षा अधिक वेळ लागणार असेल, तर त्याला तिकिटाच्या दराएवढेच शुल्क पार्किंगसाठी द्यावे लागणार आहे. चारचाकी चालकांना आणि मेट्रोच्या तिकीटापेक्षा अधिक रक्कम खर्च करावी लागणार आहे. अशा वेळी अनेक नागरिक पार्किंगसाठी एवढे शुल्क भरण्याऐवजी आपल्याच दुचाकी अथवा चारचाकीने इच्छित स्थळी जाण्यास प्राधान्य देण्याची शक्यता अधिक आहे. महामेट्रो ही सार्वजनिक वाहतूक सेवा पुरविणारी कंपनी असताना पार्किंगसाठी एवढे जादा दर लावल्यास मेट्रोने सध्या जाणारे प्रवासीही कमी होण्याची भीती आहे. महापालिकेच्या वाहनतळांवर पार्किंगसाठी कमी शुल्क आकारले जात असताना, त्याच शहरात सेवा देणाऱ्या महामेट्रोने प्रवाशांच्या खिशात हात घालून नफेखोरी करू नये, अशीच सर्वसामान्यांची भावना आहे.