म. टा. प्रतिनिधी, पिंपरी : पाळीव श्वानांच्या वाढत्या संख्येमुळे त्यांच्या मालकांची गरज लक्षात घेऊन पिंपरी-चिंचवड महानगरपालिकने शहरातील पहिलेच ‘डॉग पार्क’ तयार केले आहे. पिंपळे सौदागरमधील गोविंद चौकात ६५ गुंठ्यांमध्ये सर्व सोयीसुविधा असलेले हे डॉग पार्क आहे. पाळीव श्वानांच्या मालकांनी केलेल्या मागणीनुसार, श्वानांचे वाढदिवस साजरे करता यावेत, यासाठी महापालिकेने येथे स्वतंत्र ‘सेलिब्रशन पॉइंट’ही तयार केला आहे.
शहरातील उच्चभ्रू सोसायट्यांत पाळीव श्वानांची संख्या मोठी आहे. या श्वानांचे मालक आपल्या पोटच्या मुलाप्रमाणे श्वानांचा सांभाळ करतात. मात्र, या पाळीव श्वानांना खेळण्या- बागडण्यासाठी शहरात वेगळी जागा उपलब्ध नव्हती. त्यातून ‘डॉग पार्क’ ही संकल्पना साकार झाली.
पिंपरी-चिंचवड महापालिकेच्या पशुवैद्यकीय विभागाने सद्यस्थितीत दीड हजार श्वान परवाने वितरीत केले आहेत. शहरातील वाकड, पिंपळे सौदागर, पिंपळे निलख, नवी सांगवी, रहाटणी, पिंपळे गुरव, रावेत या भागांत श्वान परवानाधारक नागरिकांची सर्वाधिक संख्या आहे. शहरातील श्वानप्रेमी नागरिक रस्त्यावर आणि पदपथांवर श्वानांना फिरवतात. त्यामुळे अनेक भागांत अस्वच्छता निर्माण होते. त्या श्वानांना स्वतंत्र पार्क असावे, तेथे श्वानांना खेळण्यास जागा असावी, अशी मागणी श्वानप्रेमी नागरिक करीत होते. त्यानुसार पिंपळे सौदागर येथे ‘डॉग पार्क’ उभारण्यात आले आहे.
या ‘डॉग पार्क’मध्ये प्राथमिक टप्प्यात पट्टे नसलेल्या श्वानांसाठी सुरक्षित खेळाची जागा उपलब्ध करून देण्यात येणार आहे. पाळीव प्राण्यांच्या मालकांसाठी स्वतंत्र बैठक व्यवस्था तयार केली आहे. ‘डॉग पार्क’मध्ये प्रवेश क्षेत्र, तिकीट काउंटर असणार आहे. मोठ्या श्वानांच्या खेळाच्या जागा लहानांपासून वेगळ्या ठेवल्या आहेत. आक्रमक स्वभावाच्या श्वानांनाही विविध प्रकारे खेळण्यास जागा तयार केली आहे.
‘डॉग पार्क’मधील सुविधा
– पिंपळे सौदागरमधील डॉग पार्कमध्ये दोन फूट उंच दगडी भिंतीवर पाच फुटांचे बाह्य कुंपण असणार आहे.
– वेगवेगळ्या श्वानांसाठी वेगवेगळी खेळण्याची जागा असेल.
– पिण्याच्या पाण्याची सोय, मालकांसाठी विश्रांती कक्ष सुविधा, कँटीन असेल.
– सायंकाळी आणि पहाटे फेरी मारण्यासाठी पुरेशी प्रकाशयोजना, पाळीव प्राण्यांच्या खेळाच्या निरीक्षणाची सोय.
– सकाळ-सायंकाळ चार तास काळजी घेणाऱ्या प्रशिक्षकाची सुविधा.
– आवश्यक असल्यास श्वानांना प्रशिक्षण देण्यात येणार.
– लगतच्या रस्त्यावर पार्किंगची जागा दिली जाणार आहे.
डिस्पोजलचीही सुविधा
अनेक पाळीव श्वान पदपथ किंवा रस्त्यावरच विष्ठा करतात. त्यामुळे परिसरात घाण होते. यासाठी ‘डॉग पार्क’मध्ये पाळीव श्वानांना विष्ठा करण्यासाठी ‘डिस्पोजल पॉइंट’ केला आहे.
महापालिकेने गोविंद चौकात ‘डॉग पार्क’ तयार केले आहे. शहरातील श्वानप्रेमींना ‘डॉग पार्क’मध्ये दिलेल्या सोयी सुविधांमुळे निश्चित फायदा होईल. ‘डॉग पार्क’ पिंपरी-चिंचवडमधील पहिलेच असून, राज्यातील हे दुसरे ‘डॉग पार्क’ आहे. मुंबईतही असे पार्क असून, त्यापेक्षा दर्जेदार सुविधांनी आपल्या महापालिकेने हे ‘डॉग पार्क’ उभारले आहे. यामुळे श्वानप्रेमींना श्वानांसाठी हक्काचे ठिकाण निर्माण झाले आहे.- संदीप खोत, उपायुक्त, पशुवैद्यकीय विभाग