मुंबई : शिवसेना ठाकरे गटाचे माजी नगरसेवक अभिषेक घोसाळकर यांच्यावरील झालेल्या गोळीबारात त्यांचा मृत्यू झाला आहे. धक्कादायक म्हणजे त्यांच्यावर गोळीबार केलेल्या मॉरिस भाईने स्वत:वरही गोळ्या झाडून आत्महत्या केली. मॉरिस भाईने अभिषेक यांना एका कार्यक्रमाला बोलावलं होतं. तो कार्यक्रम सुरू होण्याची आधी सदर कार्यक्रमाविषयी फेसबुक लाईव्हद्वारे अभिषेक माहिती देत असताना मॉरिस याने त्यांच्यावर गोळीबार केला. मारण्याच्या उद्देशानेच अभिषेक यांना मॉरिसने कार्यक्रमाला बोलावलं होतं.
अभिषेक घोसाळकर यांच्यावर गोळीबार झाल्यानंतर लगोलग त्यांना दहिसरमधील ‘करुणा’ रुग्णालयात दाखल करण्यात आलं होतं. डॉक्टरांचं त्यांना वाचविण्यासाठी शर्थीचे प्रयत्न करत होते. परंतु छातीत गोळी लागल्याने आणि रक्तस्त्राव झाल्याने त्यांची प्रकृती खूपच गंभीर होती. ते उपचारांना प्रतिसादही देत नव्हते. शिवसेना ठाकरे गटाचे नेते माजी आमदार विनोद घोसाळकर यांचे अभिषेक हे पुत्र आहेत. ते आदित्य ठाकरे यांचे निकटवर्तीय मानले जातात.
फेसबुक लाईव्ह सुरू असतानाच गोळीबार….
मॉरिस भाईने एका कार्यक्रमाचं आयोजन केलं होतं. या कार्यक्रमाच्या आधी फेसबुक लाईव्हवरून सदर कार्यक्रमाविषयी अभिषेक माहिती देत होते. ४ मिनिटांच्या संबोधनानंतर बोलणं आटपून ते खुर्चीतून उठत असतानाच कॅमेरामागील मॉरिसने अभिषेक यांच्यावर गोळीबार केला. त्यांच्यावर ४ गोळ्या झाडल्या. ते रक्ताच्या थारोळ्यात पडल्यानंतर मॉरिसने स्वत:वरही गोळ्या झाडून आत्महत्या केली.
अभिषेक यांच्या छातीवर पहिली गोळी लागली. पहिली गोळी लागल्यानंतर ते खाली वाकल्यामुळे दुसरी गोळी त्यांच्या खांद्याला लागली. दोन गोळ्यानंतर ते खाली पडत असतानाच तिसरी आणि चौथी गोळी त्यांच्या पाठीला लागली.
फेसबुक लाईव्हच्या चौथ्या मिनिटाला हा गोळीबार झाला, परंतु गोळीबारानंतर पुढील ४५ मिनिटे हे फेसबुक लाईव्ह सुरूच होतं. ४९ व्या मिनिटाला अखेर हे फेसबुक लाईव्ह बंद करण्यात आले.
आधी मैत्री, नंतर कडाक्याचं भांडणं, पुन्हा मैत्री, आता थंड डोक्याने काटा काढला
मॉरिस हा बलात्काराच्या गुन्ह्यात तुरुंगात गेला होता. अभिषेक घोसाळकर यांच्यामुळेच आपल्याला तुरुंगात जायला लागलं, असा त्याचा संशय होता. तेव्हापासून अभिषेक यांच्याबद्दल त्याच्या मनात राग होता. तुरुंगातून जामिनावर सुटल्यानंतर मॉरिसने अभिषेक यांचा काटा काढण्याचं ठरवलं.
आधी मॉरिसने अभिषेक घोसाळकर यांच्याशी मैत्री केली. आजही एका कार्यक्रमाला घोसाळकर यांनी आमंत्रित करून तिथेच त्यांच्यावर मॉरिसने गोळीबार केल्याची माहिती पोलीस सूत्रांनी दिली आहे.
कोण आहेत अभिषेक घोसाळकर?
ठाकरे गटाचे नेते माजी आमदार विनोद घोसाळकर यांचे अभिषेक घोसाळकर हे चिरंजीव आहेत. अभिषेक घोसाळकर हे मुंबई महापालिकेचे नगरसेवक राहिलेले आहेत. तसेच मुंबै बँकेचे ते संचालक देखील आहेत. अभिषेक हे आदित्य ठाकरे यांचे निकटवर्तीय मानले जातात. नागरिकांच्या प्रश्नांसाठी भांडणारा नगरसेवक म्हणून त्यांची ओळख आहे.