त्याचवेळी माझ्या पवारसाहेबांबद्दलच्या भावना मी वेळोवेळी मांडलेल्या आहेत. पण काही लोकांना ‘ध’ चा ‘मा’ करायची सवयच असते, अशा नाटकीबाज लोकांना मी महत्त्व देत नाही, अशा शब्दात आव्हाड यांच्यावर टीका केली. तसेच सर्वसामान्य लोकांना माझ्या भावना कळाव्यात, म्हणून मी हे म्हणणं मांडत असल्याचंही अजित पवार यांनी आवर्जून नमूद केलं.

बारामतीत बोलताना अजित पवार नेमकं काय म्हणाले, ज्यावरून वाद सुरू आहे?

लोकसभा निवडणुकीवेळी तुम्हाला भावनिक आवाहन करतील, शेवटची निवडणूक असल्याचं सांगतील, खरंच त्यांची शेवटची निवडणूक कधी असेल ते माहिती नाही. पण मतदारांनो तुम्ही भावनिक होऊ नका, असे टोकदार विधान उपमुख्यमंत्री अजित पवार यांनी शरद पवार यांच्यावर टीका करताना केले. बारामती दौऱ्यावर असलेल्या उपमुख्यमंत्री अजित पवार यांच्या हस्ते राष्ट्रवादीच्या (अजित पवार गट) कार्यालयाचं उद्घाटन संपन्न झालं. यावेळी केलेल्या भाषणात त्यांनी आगामी निवडणुकीच्या दृष्टीने कार्यकर्त्यांची शाळा घेतली. यावेळी वरिष्ठांचं आतापर्यंत ऐकलं. आता माझं ऐका, अशी विनंतीही त्यांनी मतदार-कार्यकर्त्यांना केली.

जितेंद्र आव्हाड अजित पवार यांना काय म्हणाले होते?

“अजित पवार यांचं हे विधान चीड आणणारं आहे, तितकंच संतापजनक आहे. आपल्या काकाची मृत्यूची वाट पाहणं हे काय राजकारण आहे का?” असा सवाल जितेंद्र आव्हाड यांनी केला. महाराष्ट्राला पण कळेल की आपल्या काकाच्या मृत्यूची वाट बघणारा काय माणूस आहे हा… बारामतीकर अशा माणसाला त्याची जागा दाखवतील, अशा शब्दात आव्हाडांनी अजित पवार यांचा समाचार घेतला होता.