‘एचएमआयएस’ प्रणाली बंद असल्याने डॉक्टरांना आणि कर्मचाऱ्यांना रुग्णांचा केस पेपर, दिलेले उपचार, डिस्चार्ज कार्ड याबरोबरच संपूर्ण माहिती हाताने लिहावी लागत होती. रुग्णांनाही तपासणी अहवाल एका विभागातून दुसऱ्या विभागांत फिरावे लागत होते. त्यामुळे रुग्णालयातील रुग्णसेवा संथ झाल्याचेही दिसून आले होते. ‘एचएमआयएस’ बंद असल्याचा फटका डॉक्टर, कर्मचाऱ्यांबरोबरच रुग्णांनाही बसत होता. त्यामुळे ही प्रणाली पुन्हा सुरू करण्याची मागणी करण्यात येत होती. प्रणाली पुन्हा सुरू झाल्यानंतर डॉक्टर आणि कर्मचाऱ्यांना रुग्णांची माहिती हाताने लिहावी लागणार नाही. त्यामुळे रुग्णालयांमधील फाइल आणि कागदांचा वापर कमी होणार असल्याचे वैद्यकीय शिक्षण विभागाचे म्हणणे आहे.

काय आहे ‘एचएमआयएस’ प्रणाली?

‘एचएमआयएस’मध्ये रुग्ण नोंदणी ऑनलाइन केली जाते. रुग्णाला एक विशिष्ट ओळख क्रमांक दिला जातो. डॉक्टरांनी रुग्णांना दिलेली औषधे आणि उपचारांची नोंद ऑनलाइन पद्धतीने करण्यात येते. दुसऱ्यांदा जेव्हा रुग्ण रुग्णालयात येतो, तेव्हा ‘एचएमआयएस’मध्ये रुग्णांचा ओळख क्रमांक टाकताच रुग्णाचा संपूर्ण इतिहास एका क्लिकवर डॉक्टरांना दिसतो.
कैद्याच्या पोटातील किल्लीचे गौडबंगाल; महिन्यात दुसऱ्यांदा आढळली चावी, कुठलं गुपित ‘कुलुपूबंद’?
‘एचएमआयएस’ प्रणालीचे फायदे

– रुग्णांच्या नोंदी ठेवता येतात.
– तपासणी अहवाल एका क्लिकवर उपलब्ध होतो.
– रुग्णाचा संपूर्ण इतिहास एका क्लिकवर डॉक्टरांना कळतो.
– कमी वेळेत सर्व प्रक्रिया होते.
– डॉक्टरांना कागदावर लिहिण्याची गरज पडत नाही.

राज्यातील सर्व सरकारी वैद्यकीय महाविद्यालयांमध्ये पुन्हा ‘एचएमआयएस’ प्रणाली सुरू करण्यात येणार आहे. याबाबतचे काम अंतिम टप्प्यात असून, या महिन्याच्या शेवटपर्यंत ही प्रणाली सुरू करण्यासाठी प्रयत्न सुरू आहे. नवीन प्रणाली पूर्वीच्या तुलनेत अद्ययावत करण्यात आली आहे.- दिनेश वाघमारे, सचिव, वैद्यकीय शिक्षण विभाग