महापौर रितू तावडे यांच्या आलिशान गाडीला समोरून लाल-निळे लखलखणारे दिवे बसवले आहेत. उपमहापौरांना असलेल्या सुरक्षारक्षकासह पीएसच्या नव्या स्कॉर्पिओ गाडीच्या टॉपवरही लखलखणारे लाल-निळे दिवे बसविले आहेत.

एप्रिल २०१७ मध्ये केंद्र सरकारने गाडीवर लाल दिवा वापरावर बंदी आणली. त्यामुळे अनेक मंत्र्यांसह वरिष्ठ अधिकाऱ्यांच्या गाडीवरील लखलखणारे लाल दिवे काढण्यात आले. याची अंमलबजावणी १ मे २०१७ पासून करण्यात आली, ती आजपर्यंत सुरूच आहे. या निर्णयानंतर मुंबई महापौरांच्या गाडीसाठी वापरण्यात येणारा लाल दिव्याचा वापरही बंद झाला. केंद्र सरकारच्या निर्णयानंतर सलग नऊ वर्षे अशाप्रकारची व्हीआयपी ट्रीटमेंट बंद होती. काही मंत्री आणि अधिकाऱ्यांकडून त्याचा वापर करताच टीका होऊ लागली.

मात्र यावर शक्कल लढवून मुंबई महापौरांच्या गाडीला समोरच्या बाजूस लखलखणारे लाल-निळे दिवे बसवण्यात आले आहेत. प्रथम नागरिक असलेल्या मुंबई महापौरांना अनेक विविध कार्यक्रमांना वेळेत पोहोचावे लागते. राष्ट्रपती, पंतप्रधान, राज्यपाल किंवा परदेशातील मंत्री आल्यास त्यांच्या स्वागतासाठी वेळेत पोहोचणे गरजेचे असते. त्यामुळे एक राजशिष्टाचार म्हणून त्यांच्या गाडीच्या पुढील बाजूस आणि सोबत असणाऱ्या ताफ्यातील वाहनाला लखलखणारे लाल निळे दिवे बसवण्यात आल्याचे सांगण्यात येत आहे. मात्र यावर महापालिकेतील कोणीही बोलण्यास तयार नाही. मुंबई महापौरांच्या ताब्यात पुन्हा एकदा व्हीआयपी संस्कृती आल्याची मात्र चांगलीच चर्चा रंगली आहे.