म. टा. प्रतिनिधी, नाशिक : थंडी वाढू लागल्याने आरोग्यवर्धनासाठी फळांच्याही मागणीत वाढ झाली आहे. मात्र, आरोग्यासाठी उत्तम मानला जाणारा फलाहार सर्वसामान्यांच्या आवाक्याबाहेर जात आहे. फळ बाजारात जवळपास सर्वच फळांचे दर १० ते २० टक्क्यांनी वाढलेले आहेत. फळ विक्रेत्यांकडे सफरचंद, सीताफळ, डाळिंब, पेरू या देशी फळांसह स्ट्रॉबेरी, प्लम, ब्ल्यूबेरी, ड्रॅगन फ्रूट आदी फळांचे दरही वाढले आहेत.
हिवाळा सुरू होण्यापूर्वीच फळ बाजारात सीताफळ दाखल होण्यास सुरुवात झाली आहे. मात्र, अद्याप आवक निम्म्याने घटलेली असल्यामुळे दर शंभरीपार गेले आहेत. किरकोळ फळ विक्रेत्यांकडे सीताफळ प्रतवारीनुसार १२० ते १५० रुपये किलोने विक्री होत आहे. याउलट गेल्या महिन्यात दोनशेपार गेलेल्या सफरचंदांचे दर घसरण्यास सुरुवात झाली आहे. काही महिन्यांपूर्वी पावसामुळे सफरचंदांची आवक प्रभावित झाली होती. त्यामुळे दर २५० रुपयांपर्यंत पोहोचले होते. आता आवक काही प्रमाणात सुरळीत असल्याने दर ५० ते १०० रुपयांनी घसरले आहेत. असे असले तरीही सर्वसामान्य नाशिककरांसाठी अजूनही सफरचंद आवाक्याबाहेरच आहेत.
हिवाळा सुरू होण्यापूर्वीच फळ बाजारात सीताफळ दाखल होण्यास सुरुवात झाली आहे. मात्र, अद्याप आवक निम्म्याने घटलेली असल्यामुळे दर शंभरीपार गेले आहेत. किरकोळ फळ विक्रेत्यांकडे सीताफळ प्रतवारीनुसार १२० ते १५० रुपये किलोने विक्री होत आहे. याउलट गेल्या महिन्यात दोनशेपार गेलेल्या सफरचंदांचे दर घसरण्यास सुरुवात झाली आहे. काही महिन्यांपूर्वी पावसामुळे सफरचंदांची आवक प्रभावित झाली होती. त्यामुळे दर २५० रुपयांपर्यंत पोहोचले होते. आता आवक काही प्रमाणात सुरळीत असल्याने दर ५० ते १०० रुपयांनी घसरले आहेत. असे असले तरीही सर्वसामान्य नाशिककरांसाठी अजूनही सफरचंद आवाक्याबाहेरच आहेत.
परदेशी फळेही महागली
फळ बाजारात परदेशी फळांना मोठ्या प्रमाणात मागणी आहे. मात्र, सध्या डाळिंब, पेरू, सीताफळासह परदेशी फळांचाही गोडवा महागला आहे. फळ बाजारात स्ट्रॉबेरी ३२० ते ४००, प्लम ३०० ते ३२० रुपयांनी विक्री होत आहे. याचबरोबर ड्रॅगन फ्रूट ६० ते ८० रुपयांना एक नग मिळत आहे.
असे आहेत दर (प्रतिकिलो)
सफरचंद : १५० ते २००
डाळिंब : २५० ते ३००
पेरू : १००
सीताफळ : १२०
स्ट्रॉबेरी : ३२० ते ४००
चिकू : ८०
पपई : ६०
प्लम : ३०० ते ३२०
संत्री : १०० ते १२०
केळी (डझन) : ४०
इलायची केळी (डझन) : ८० ते १००
बाजारात सर्वच फळांचे दर काही प्रमाणात वाढलेले आहेत. थंडी वाढल्यानंतर संत्री, सफरचंद आणि सीताफळांची आवक वाढेल. त्यामुळे या फळांचे दर घसरण्याची शक्यता आहे.- मधुकर भागवत, फळविक्रेता