“निवडणूक आयोग जर विरोधी पक्षातल्या राहुल गांधी, प्रियांका गांधी यांना त्यांच्या भाषणांवरून नोटीस पाठवत असेल. तर ते काम करतायेत असं प्रथमदर्शनी वाटतंय. तर हेच काम अमित शाह यांच्या भाषनांनंतर ते करणार आहेत का? की त्यांच्यासाठी वेगळी आचारसंहिता निवडणूक आयोगाने तयार केली आहे?” असा बोचरा सवाल उद्धव ठाकरे यांनी निवडणूक आयोगाला विचारला.

“देशात काही राज्यांमध्ये निवडणुका आहेत. क्रिकेटमध्ये काही नियम असतात तशीच निवडणूक आचारसंहिता असते.काही शंकांवर खुलासा होण्यासाठी आम्ही निवडणूक आयोगाला पत्र लिहिलंय. निवडणूक आयोगाचं धोरण अनेकदा असं दिसतंय की भाजप सत्तेवर असल्यामुळे त्यांना फ्री हिट द्यायची आणि आम्ही काही केलं तर आमची हिट विकेट काढायची. याला मुक्त वातावरणातल्या निवडणुका म्हणता येणार नाही”, असं उद्धव ठाकरे म्हणाले.

उद्धव ठाकरे म्हणाले, “देशाचे गृहमंत्री अमित शहा यांनी मध्य प्रदेशमध्ये प्रचार सभेत बोलताना भाजपाला मतदान केलं तर मोफत अयोध्यावारी घडवीन, असं वक्तव्य केलं. १९८७ साली हिंदुत्वाच्या मुद्द्यावरून बाळासाहेबांनी निवडणूक लढवली. त्यावेळी आमचे सहा आमदार बाद ठरवले तसेच बाळासाहेबांच्या मतदानावर देखील सहा वर्षांची बंद घातली गेली. मग निवडणूक आचारसंहिता असताना रामलल्लाच्या मोफत दर्शनाचे आमिष दाखवणारे अमित शाह यांना निवडणूक आयोगाने नियमातून सूट दिली आहे का?”