मोखाडा नगरपंचायत क्षेत्रातील कावळपाडा येथून अवघ्या काही मीटर अंतरावर औद्योगिक प्रशिक्षण संस्था आहे. त्याच्या मागील बाजूस समीर पिंजार या ड्रग प्रकरणातील आरोपीचे फार्महाऊस आहे. त्यातील एका खोलीत ड्रग बनवण्याचे साहित्य आणि रसायने ठेवली जात होती. काही वर्षांपासून या फार्महाऊसच्या आडून समीर ड्रग निर्मिती करत असल्याचे स्पष्ट झाले आहे. मात्र, या प्रकाराची माहिती स्थनिक पोलिस, नगरपंचायत प्रशासन अथवा रहिवाशांनी नव्हती.
नाशिकसाठी सोलापुरात फॅक्टरी; सनी पगारेचा साथीदार ताब्यात, दहा कोटींचे एमडी जप्त
नाशिकमधील ड्रगमाफिया ललित पाटील याचा कारखानाही शहरापासून दूर शिंदे गावात आढळून आला आहे. संभाजीनगर, सोलापूर आणि मुंबई या ठिकाणी कोट्यवधी रुपयांचे अमली पदार्थ पोलिसांच्या कारवाईत पकडल्याचे समोर आले आहे. त्यामुळे ग्रामीण भागात ड्रग कारखाने उभारून आणि त्यांचे वितरण शहरी भागात करून तरुण पिढीला नशेच्या जाळ्यात अडकवले जात असल्याचे पोलिस कारवाईत स्पष्ट झाले आहे. मोखाड्यातील प्रकरणानंतर ग्रामीण आदिवासी भागातील रिसॉर्ट आणि फार्महाऊस पोलिसांच्या रडावर आले आहेत. त्यामुळे पालघर जिल्ह्यातील कुपोषणामुळे चर्चेत आलेला भाग आता ड्रग कारखानाप्रकरणामुळे पुन्हा चर्चेत आला आहे. स्थानिक प्रशासन आणि रहिवाशांनी सजग राहिल्यास, ग्रामीण भागावरील ड्रगचा कलंक पुसला जाईल, असे मत व्यक्त होत आहे.

रिसॉर्ट तसेच फार्महाऊसची माहिती घेऊन तेथे अचानक पाहणी करणार आहोत. काही आक्षेपार्ह हालचाली, व्यवसाय अथवा गैरप्रकार आढळून आल्यास त्यावर तातडीने कारवाई केली जाईल.- धनंजय जगदाळे,पोलिस निरीक्षक, मोखाडा