लोकसभेतील एक खासदार आणि विधानसभेतील एक आमदार शरद पवार यांची साथ सोडून दादा गटाला पाठिंबा देणार आहे. यासंदर्भातील भूमिकाही ते लवकरच स्पष्ट करतील. तुर्तास त्यांनी पाठिंब्याचं प्रतिज्ञापत्र दिलं आहे. त्यामुळे शरद पवार गटाला मोठा हादरा बसणार आहे, हे स्पष्ट आहे. या पार्श्वभूमीवर अजितदादांकडून ब्लॅकमेलिंग सुरू असल्याचा आरोप रोहित पवार यांनी केलाय.

खरंच अजितदादांना कुणी प्रतिज्ञापत्र देऊन त्यावर स्वाक्षरी केली आहे का? हे पाहावं लागेल. पण तुम्ही सही करत नाही तोपर्यंत तुमचं काम होणार नाही, असं सांगितलं जात असल्याचं आमच्या कानावर आलंय. अशा पध्दतीने आमदारांचं ब्लॅकमेलिंग होत असल्याचं रोहित पवार म्हणाले.

मतदारसंघातले प्रश्न सुटावेत, विकासासाठी निधी मिळावा म्हणून आमदार धडपड करत असतात. पण कामे मार्गी लावायची असतील, निधी पाहिजे असेल तर आमच्याकडे या, अशा पद्धतीने दादा गटाकडून ब्लॅकमेलिंग सुरू आहे. आता जरी त्यांच्याकडे मोठा आकडा दिसत असेल पण निवडणुका येतील तेव्हा त्यांना कळेल खरंच किती लोक त्यांच्या सोबतीला राहतायेत, असं सूचक वक्तव्यही रोहित पवार यांनी केलं.