Ghansoli Nala: घणसोली परिसरातील वस्तीला लागून असलेल्या नाल्यातील पाण्याचा रंग हा गडद जांभळ्या रंगाचा झाल्याने नागरिकांमध्ये संतापाचे वातावरण आहे.
या पाण्यामुळे परिसरात तीव्र दुर्गंधी पसरली असून काही रहिवाशांना मळमळ, डोकेदुखी तसेच श्वास घेण्यास त्रास जाणवत असल्याच्या तक्रारी स्थानिकांनी केल्या आहेत. ऐन गणेशोत्सवाच्या काळातच हा प्रकार घडल्याने नागरिकांनी तीव्र नाराजी व्यक्त केली आहे.
नाले शहरातून पुढे खाडीकडे
घणसोली गावाच्या वेशीपासून सुरू होणारा हा नाला पुढे घणसोली सेक्टरमधून खाडीकडे जातो. या नाल्यालगत मोठ्या प्रमाणावर नागरी वस्ती आहे. एमआयडीसी परिसरातील विविध उद्योगांमधून निघणारे नाले शहरातून पुढे खाडीकडे जात असल्याने त्यात रसायनमिश्रित सांडपाणी सोडले जात असल्याचा आरोप स्थानिकांकडून करण्यात येत आहे.
काही प्रमाणात त्रास सुरू
पावसाळ्यात मोठ्या प्रमाणावर पाणी वाहत असल्याने हा त्रास काही प्रमाणात कमी जाणवतो. मात्र, पावसाने विश्रांती घेतल्यानंतर नाल्यातील दुर्गंधी आणि प्रदूषणाचा त्रास अधिक तीव्र होतो, असे रहिवाशांचे म्हणणे आहे.
नाल्याच्या दुर्गंधी वाढली
गेल्या काही दिवसांपासून पावसाने विश्रांती घेतल्याने घणसोली परिसरात नाल्याची दुर्गंधी वाढली होती. सोमवारी सकाळी नाल्यात गडद जांभळ्या रंगाचे पाणी वाहताना नागरिकांच्या निदर्शनास आले. पाण्याचा रंग आणि दुर्गंधी यामुळे परिसरात काही काळ अस्वस्थतेचे वातावरण निर्माण झाले. दूषित पाण्याच्या संपर्कामुळे किंवा त्यातून निर्माण होणाऱ्या वायूमुळे काही नागरिकांना मळमळ आणि डोकेदुखीचा त्रास जाणवू लागल्याचे स्थानिकांनी सांगितले.
Mumbai High Court : सर्वात मोठी बातमी! सार्वजनिक ठिकाणी फटाके वाजवण्यास बंदी, मुंबई हायकोर्टाचे निर्देश
नाल्यातील पाण्याची तातडीने तपासणी करून त्यातील रासायनिक घटकांचा शोध घ्यावा, तसेच संबंधित उद्योगांची चौकशी करावी, अशी मागणी नागरिकांनी केली आहे. महाराष्ट्र प्रदूषण नियंत्रण मंडळाने या प्रकरणाची तातडीने दखल घेऊन एमआयडीसीतील रासायनिक कंपन्यांची पाहणी करावी आणि नियमांचे उल्लंघन करणाऱ्यांवर कारवाई करावी, अशी मागणी घणसोलीतील रहिवासी स्मिता देशमुख यांनी केली.
प्रक्रिया न करता सांडपाणी सोडल्याचा आरोप
एमआयडीसीतील रासायनिक उद्योगांनी सांडपाण्यावर आवश्यक प्रक्रिया केल्यानंतरच ते बाहेर सोडणे अपेक्षित आहे. मात्र, काही कंपन्यांकडून प्रक्रिया न करता रसायनमिश्रित पाणी थेट नाल्यात सोडले जात असल्याचा आरोप नागरिकांनी केला आहे. सोमवारी नाल्यात दिसलेल्या गडद जांभळ्या रंगाच्या पाण्यामुळे हा प्रकार गंभीर असल्याचे स्पष्ट होते, असे रहिवाशांचे म्हणणे आहे.
लेखकाबद्दलकांचन परुळेकरकांचन परुळेकर महाराष्ट्र टाइम्स ऑनलाईनमध्ये कन्सलटंट पदावर कार्यरत आहेत. कांचन स्थानिक बातम्या, पायाभूत सुविधा, बांधकाम आणि विकास प्रकल्प यासाठी लिखाण करतात. त्यांच्या पत्रकारितेच्या प्रवासाला सुरुवात ही महाराष्ट्र टाइम्स ऑनलाईनमधून झाली. मार्च २०२६ मध्ये महाराष्ट्र टाइम्सच्या व्हिडिओ विभागात त्यांनी इंटर्न म्हणून काम केले. सुरुवातीला त्यांनी युट्यूब, फेसबुक आणि इन्स्टाग्रामसाठी कन्टेंट तयार करताना व्हिडिओ आणि लेख लिहिले आहेत. महाराष्ट्रातील राजकीय घडामोडी, स्थानिक बातम्या आणि क्राइमसह स्पोर्ट्सवर इत्यादी विषयांचे वाचन आणि लेखन करण्याची त्यांना विशेष आवड आहे.
कांचन यांचे संपूर्ण शिक्षण मराठी माध्यमातून झाले असून पत्रकारितेची आवड असल्याने त्यांनी कोकण ते मुंबई असा शैक्षणिक प्रवास केला. २०२५ मध्ये बॅचलर्सचे शिक्षण गावी पूर्ण केले. इकोनॉमिक्स या विषयातून पद्वी घेतली. लिखाणाची आवड, संवाद साधण्याचे कौशल्य आणि पत्रकारितेची आवड समजून घेऊन साठ्ये कॉलेज विलेपार्ले येथे वृत्तपत्रविद्या आणि संवाद या विषयात त्यांनी पद्व्युत्तर शिक्षणासाठी प्रवेश घेतला.
महाविद्यालयीन काळात कला आणि नाटक विषयात विशेष आवड असल्याने त्यांनी अभिनयदेखील केले आहे. काही नाटक त्यांनी लिहिले आहेत. मुंबई विद्यापीठाच्या युथ फेस्टिवलमध्ये त्यांना अभिनयासाठी ब्रॉन्झ आणि सिल्व्हर मेडल देण्यात आले आहेत. कविता आणि लेख लिहिण्याची आवड असल्याने शाळा ,कॉलेज मासिक अंकात त्यांचे लेख देखील प्रसिध्द झाले आहेत.
२०२६ मध्ये महाराष्ट्र टाइम्स ऑनलाईन सोबत जोडल्या गेल्यानंतर त्यांची पत्रकारितेची आवड अगदी स्पष्ट झाली. बोलण्यातला स्पष्टपणा लिखाणातली पारदर्शकता अधिक नव्याने समजत गेली. तीन महिन्यांच्या इंटर्नशिप नंतर त्या आता कन्सलटंट पदावर म.टा. समुहात सहभागी झाल्या आहेत. पारदर्शकता आणि विश्वासार्ह माहिती वाचकांपर्यंत पोहचवण्याचं काम त्या करत आहेत.… आणखी वाचा