म. टा. वृत्तसेवा, नवी मुंबई: महावितरणच्या भरारी पथकाने पनवेलमधील एका हॉटेलचालकाची तब्बल तीन कोटी रुपयांची वीजचोरी पकडली आहे. दत्ता भोईर असे या हॉटेलचालकाचे नाव असून त्याने मीटरमध्ये छेडछाड करून रीडिंग बदलून ही वीजचोरी केल्याचे तपासणीत आढळून आले आहे. या हॉटेलचालकाला वीजचोरीच्या दंडाची रक्कम भरण्याचे आदेश देण्यात आले असून अन्यथा वीज कायद्यातील तरतुदींनुसार गुन्हा नोंदवण्यात येणार आहे.
महावितरणचे अध्यक्ष आणि व्यवस्थापकीय संचालक लोकेश चंद्र यांनी मोठ्या प्रमाणात वीजचोरी शोध मोहीम राबवण्याचे आदेश दिले आहे. त्यानुसार, सुरक्षा आणि अंमलबजावणी विभागाच्या कार्यकारी संचालिका स्वाती व्यवहारे आणि विभागाचे कोकण परिक्षेत्राचे उपसंचालक सुमित कुमार यांच्या मार्गदर्शनाखाली अतिरिक्त कार्यकारी अभियंता बाकू रामदास मानवटकर, साहाय्यक अभियंता कुणाल पिंगळे, साहाय्यक सुरक्षा व अंमलबजावणी अधिकारी आकाश गौरकर व सुरक्षा व अंमलबजावणी विभागाचे अधिकारी व कर्मचाऱ्यांनी ही कारवाई केली.