म. टा. प्रतिनिधी, नाशिक : सिन्नर तालुक्यात साकारणाऱ्या ५.६ टीएमसी क्षमतेच्या दमणगंगा-वैतरणा-कडवा-देव या नदीजोड प्रकल्पाचा अंतिम प्रकल्प अहवाल नॅशनल वॉटर डेव्हलपमेंट ॲथॉरिटीने राज्य सरकारला सादर केला आहे. त्यामुळे दुष्काळी सिन्नर तालुक्यातील सिंचन, उद्योग आणि पिण्याच्या पाण्याची समस्या मार्गी लागून तो सुजलाम सुफलाम होण्याच्या आशा पल्लवित झाल्या आहेत.
…या कामांचे नियोजन
सविस्तर प्रकल्प अहवालात विविध कामांचा समावेश आहे. दमणगंगा व वैतरणा खोऱ्यातील निळमाती, मेट, कोशिमशेट, उधळे येथे बंधारे बांधणे, ऊर्ध्व वैतरणा-कडवा ते बोरखिंड धरणांचा उपयोग करून पाणी वळविणे, या चार जलाशयांमधील पाणी वैतरणा धरणात आणून तेथून २८ किलोमीटर पाइपने कडवा धरणात टाकणे, बोरखिंड ते देव नदीदरम्यान पाइपलाइन व बोगद्याद्वारे पाणी सिन्नर तालुक्यात देव नदीच्या उगमस्थानापर्यंत आणून तेथून ते सिन्नरच्या पूर्व भागापर्यंत नेण्याचे नियोजन आहे.
…असा होणार पाणी वापर
सिंचनासाठी : ३६०० दशलक्ष घनफूट
पिण्यासाठी : ८४७ दशलक्ष घनफूट
उद्योगासाठी : ८३८ दशलक्ष घनफूट
…असा आहे प्रकल्प
प्रकल्पाची एकूण लांबी ८३.२ किलोमीटर
ऊर्ध्वगामी जलवाहिनीची लांबी : ४१.६९ किलोमीटर
बोगद्यांची लांबी १६.९४ किलोमीटर
विजेची गरज : १२६ मेगावॅट
पाणी उपलब्धता : ५६०० दशलक्ष घनफूट
भूसंपादन : १३९४ हेक्टर