हिंदू धर्मात आज ही गोमातेला देवासमान मानले जाते. आजही गोमातेची पूजा करून तिच्या पाया पडण्याची प्रथा आहे. कुमकर या शेतकऱ्याने गोमातेला जीव लावून लहान बाळाचा जसा सांभाळ करतो, तसा तिचा सांभाळ केला होता. त्यांची चौदा ते पंधरा वर्षाची ती गाय गेल्यावर तिचा मालक मोठमोठ्याने रडत होता. गाय गेल्यावर तिला कुठे तरी रानात टाकून दिले जाते. परंतु तसे न करता त्या शेतकऱ्याने गाय गेल्यावर तिच्या अंगावर वस्त्र टाकून तिची अंत्ययात्रा बैलगाडीतून काढली. बैलगाडीच्या पुढे भजन म्हणत ग्रामस्थ चालले होते. गावातून गाईची अंत्ययात्रा काढून तिचे पावित्र्य जपले गेले असल्याचे दृश्य ब्राम्हणघर येथे पहायला मिळाले. गाईची घरातील सदस्याप्रमाणे अंत्ययात्रा काढून शेतात, गाईला पुरण्यात आले. अतिशय भक्तीमय वातावरणात गायीला निरोप देण्यात आला.