‘गोगलगाय निशाचर असल्याने रात्रीच्या वेळी मोसंबी झाडावर चढून साल, पाने खाऊन नुकसान करते. झाडाच्या खोडास पावसाळ्याच्या सुरवातीस बोर्डोपेस्ट लावल्यास ही कीड झाडावर जात नाही. त्यातून मोसंबी झाडाचा बुरशी आणि गोगलगायीपासून बचाव करण्यास मदत मिळते,’ असे पाटील यांनी सांगितले.

कीडीने पाने खाण्यास सुरुवात केल्यामुळे फवारणीशिवाय पर्याय उरलेला नाही. गोगलगायी वेचून मिठाच्या पाण्यात टाकण्याचे आवाहन कृषी शास्त्रज्ञांनी केले होते. मात्र, शेतकऱ्यांनी दुसऱ्या पर्यायांची विचारणा केली आहे. गोगलगायींचा आकार आणि संख्या वाढल्याने सोयाबीन पिकाचे सर्वाधिक नुकसान होत आहे.

जनजागृती मोहीम

– छत्रपती संभाजीनगर, बीड, लातूर, हिंगोली जिल्ह्यांतील काही भागांत गोगलगायींचा प्रादुर्भाव
– कपाशी, सोयाबीन या पिकांना फटका बसण्याची शक्यता.
– गोगलगायींचा प्रादुर्भाव रोखण्यासाठी कृषी विभागाकडून जनजागृती मोहीम.

पिकामध्ये गोगलगायींचा प्रादुर्भाव मोठ्या प्रमाणावर दिसत आहे. शेतकऱ्यांनी सामूहिक उपाययोजना केल्यास या किडीचे नियंत्रण प्रभावीपणे करता येते. फळझाडावर गोगलगायी असल्यास बोर्डोमिश्रण किंवा कॉपर सल्फेटच्या द्रावणांची फवारणी केल्यास नियंत्रण करणे सोपे होईल.- डॉ. संजय पाटील, कृषी शास्त्रज्ञ