म. टा. प्रतिनिधी, नाशिक/ म. टा. वृत्तसेवा सिडको : अंबड परिसरात खुनाचे सत्र सुरूच आहे. अंबडच्या संजीवनगर भागात दुहेरी हत्याकांडाची घटना ताजी असतानाच पूर्ववैमनस्य आणि आर्थिक देवाण-घेवाणीच्या वादातून तीन सराईतांनी धारदार शस्त्राने वार करून युवकाचा खून केला. अंबडच्या महालक्ष्मीनगर परिसरात गुरुवारी दुपारी अडीच वाजेच्या सुमारास हा थरारक प्रकार घडला. दिवसाढवळ्या खुनाच्या घटना घडू लागल्याने अंबड ग्रामस्थांमध्ये भीतीचे वातावरण आहे. त्यांनी मृतदेह ताब्यात न घेण्याचा पवित्रा स्वीकारल्याने तणाव निर्माण झाला होता.
काय घडलं?
काय घडलं?
अंबड पोलिसांनी दिलेल्या माहितीनुसार, मयूर केशव दातीर (वय २१, रा. महालक्ष्मीनगर, अंबड) असे या हल्ल्यात मृत्यू झालेल्या युवकाचे नाव आहे. अरुण उत्तम वैरागर (वय २०, रा. फडोल मळा) यांनी फिर्याद दिली आहे. त्यावरून मुख्य सूत्रधार करण अण्णा कडुस्कर, रवी आहेर आणि मुकेश मगर या संशयितांवर गुन्हा दाखल करण्यात आला आहे. महालक्ष्मीनगर येथील हनुमान मंदिर चौकात दुपारी अडीचच्या सुमारास तिघे संशयित दुचाकीवरून आले. मंदिराच्या आवारात बसलेल्या मयूरच्या छातीवर आणि पोटावर त्यांनी धारदार हत्यारांनी वार केले. शरीरातून मोठ्या प्रमाणात रक्तस्त्राव झाल्याने मयूरला सिव्हिल हॉस्पिटलमध्ये हलविण्यात आले. तेथे उपचारांदरम्यान त्याचा मृत्यू झाला. यानंतर संशयितांनी पोबारा केला. घटनेची माहिती मिळताच गुन्हे शाखेचे पोलिस उपायुक्त प्रशांत बच्छाव, मोनिका राऊत, वरिष्ठ निरीक्षक प्रमोद वाघ, मनोहर कारंडे यांच्यासह पोलिसांचा फौजफाटा घटनास्थळी दाखल झाला. घटनेचा पंचनामा केल्यानंतर पथक तपासासाठी रवाना करण्याचे आदेश देण्यात आले.
दरम्यान, मयूर हा एका टाइल्सच्या दुकानात नोकरीस होता. त्याच्या कुटुंबात आई, वडील आणि लहान भाऊ आहे. या खुनाच्या घटनेच्या निषेधार्थ परिसरातील व्यापाऱ्यांनी दुकाने बंद ठेवली.
साक्ष पडली महागात
संशयित कडूस्करवर खून, घरफोड्या, हाणामाऱ्या यांसारखे १८ गंभीर गुन्हे दाखल आहेत. कडूस्कर आरोपी असलेल्या एका खुनाच्या गुन्ह्यात मयूर साक्षीदार होता. याच रागातून हा हल्ला करण्यात आल्याचे बोलले जाते आहे. कडुस्कर याच्यासह रवी आहेर, मुकेश मगर यांच्यावरही गंभीर स्वरूपाचे गुन्हे दाखल आहे. यातील मगर याला काही दिवसांपूर्वी अहमदनगर येथे तडीपार करण्यात आले आहे. तरीही तो अंबड पोलिस स्टेशनच्या हद्दीत आलाच कसा असा सवाल उपस्थित होत आहे.
कडुस्करची परिसरात दहशत
कडुस्करवर एक खुनाचा गुन्हा दाखल आहे. पंधरा दिवसांपूर्वी महालक्ष्मीनगर भागात एका टपरी चालकाला त्याने बेदम मारहाण केली होती. परंतु, अंबड पोलिसांनी किरकोळ कारवाई करत त्याला सोडून दिले. एका माजी नगरसेवकालाही त्याने धमकी दिली होती. परंतु, हा प्रकार पोलिस स्टेशनपर्यंत पोहोचला नव्हता.
कडूस्करचे एन्काउंटर करा
संतप्त रहिवाशांनी अंबड पोलिस स्टेशनपर्यंत पायी मोर्चा काढला. आरोपींवर कठोर कारवाई करावी, संशयित कडूस्कर याचा एन्काउंटर करावा, अशी मागणी पोलिसांकडे करण्यात आली. सायंकाळी उशिरापर्यंत सुमारे ५०० रहिवाशी पोलिस स्टेशनमध्ये ठिय्या मांडून बसले होते.