मातीच्या ढिगाऱ्याखील नेमके किती लोक आहेत, याचा अंदाज घेण्यासाठी पोलिसांकडून इर्शाळवाडीतील लोकांचे शेवटचे मोबाईल लोकेशन तपासले जाणार आहे. जेणेकरून संबंधित लोकांना ट्रेस करणे शक्य होईल, अशी माहिती रायगड पोलीस अधीक्षक सोमनाथ घार्गे यांनी दिली. आम्ही इर्शाळवाडीतील मोबाईल वापरत असलेल्या लोकांचा डेटा जमा करत आहोत. सध्या इर्शाळवाडीतील इतर लोकांना पायथ्याशी असलेल्या बेस कॅम्पवर ठेवण्यात आले आहे. याठिकाणी असलेल्या मृतांच्या आणि जखमींच्या नातेवाईकांचे सांत्वन करुन आम्ही त्यांच्याकडून शक्य तितकी माहिती मिळवण्याचा प्रयत्न करत आहोत. अनेकजण दु:खात आहेत. तरीही आम्ही शक्य ते प्रयत्न करुन त्यांच्या नातेवाईकांशी संपर्क का होत नाही? त्यांचा मोबाईल बंद आहे का, याबाबत विचारणा करत आहोत. त्यांच्याकडून मिळालेल्या माहितीच्या आधारे आमची सायबर टीम संबंधित मोबाईल फोनचे लास्ट लोकेशन ट्रेस करण्याचा प्रयत्न करत आहे, अशी माहिती सोमनाथ घार्गे यांनी दिली.

Irshalgad Landslide: गावाचा रस्ता चढताना एका पॉईंटला मलाही वाटलं की…. एकनाथ शिंदेंनी सांगितला तो अनुभव

दरम्यान, आज अंधार पडल्यानंतर इर्शाळवाडी येथील बचाव कार्य थांबवण्यात आले आहे. उद्या पुन्हा सकाळी हे बचाव कार्य हाती घेण्यात येणार आहे. मात्र अद्यापही या दरडीखाली अजून सुमारे १०० जण असतील अशी मोठी भीती व्यक्त करण्यात येत आहे. आज दिवसभर करण्यात आलेल्या बचाव कार्यात सहा मृतदेह हाती लागले आहेत त्यामुळे आता मृतांची संख्या २२ वरती गेली आहे.