अर्जुन चिखले यांनी मंचर कृषी उत्पन्न बाजार समितीत अडते शांताराम थोरात यांच्याकडे हमालीचे काम सुरू केले. थोरात यांनीही वेळोवेळी मदतीचा हात पुढे केला. पल्लवीची आई संगिता यांनी आजूबाजूला शेतावर काम करण्यास सुरुवात केली. तिन्ही मुलांचे प्राथमिक शिक्षण पुणे जिल्हा परिषदेच्या शेवाळवाडी शाळेत तर इयत्ता दहावीपर्यंतचे शिक्षण महात्मा गांधी विद्यालय मंचर त्यानंतर अण्णासाहेब आवटे महाविद्यालय मंचर येथे इयत्ता बारावीपर्यंत शिक्षण झाले. पल्लवीने एसपी कॉलेजला २०१९ ला बी कॉम शिक्षण पूर्ण केले. तीन वर्ष सीएचा अभ्यासक्रम नियमितपणे केला. त्यातून तिला यश देखील मिळाले.

यावेळी पल्लवीने सांगितले की, “माझ्या आई-वडिलांच्या कष्टाचे चीज झाले. त्यांनी मला सतत प्रेरणा आणि प्रोत्साहन दिले. नियमित एकाग्रतेने वाचन, सराव आणि अभ्यास केला. निकाल समजला. मी पास झाल्याचे ऐकून आई आणि बाबांच्या डोळ्यात आलेले आनंदाश्रू पाहून माझे हृदय हेलावून गेले. विद्यार्थ्यांनी यश संपादन करण्यासाठी आईवडिलांची अपार मेहनत सतत डोळ्यासमोर ठेऊन नियमित अभ्यास करावा. यश नक्कीच मिळते. असा माझा अनुभव असल्याचे तिने सांगितले.

पल्लवीची आई संगीता चिखले यांनी सांगितले की, मला आणि तिच्या वडिलांना इच्छा असूनही आर्थिक नाजूक परिस्थितीमुळे उच्च शिक्षण घेता आले नाही. पण मुलांना उच्च शिक्षण द्यायचे, असे आमचे स्वप्न होते. ते पूर्णत्वास नेण्याचे काम मुलांनी केले. याचा मला सार्थ अभिमान आहे. मोठी मुलगी श्वेता निखील शेवाळे अभियंता झाली असून मोठ्या कंपनीत नोकरी करत आहे. सीएची परीक्षा फार अवघड असते, असे नातेवाईक आणि आजूबाजूचे लोक सांगत होते. त्यामुळे चिंता वाटत होती पण निकाल लागला. तिच्या शिक्षणासाठी अर्धपोटी राहून केलेल्या प्रयत्नांना यश आले. मुलगा सिद्धेशने नुकतीच बीएससीची पदवी संपादन केली आहे. पल्लवीला मिळविलेल्या यशाचे सर्वत्र कौतुक होत आहे.